Kalistat Lund arlaannaannilluunniit salliutitsinianngilaq - Svend Hardenbergiluunniit salliutinnianngilaa
Svend Hardenberg erngup nukinganik nukissiorfissatut suliniummut salliutinneqarusuppoq, taamaattoqarsinnaanngilarli. Imminut Pilersornermut, Nukissiuuteqarnermut Avatangiisinullu Naalakkersuisoq erseqqissaavoq.
- Taamaalluni ingerlatseqatigiiffimmik erngup nukinganut isumalluutitsinnik annertuunik atuisikkusutatsinnik toqqaasussanngorutta aalajangernissaq annertuujussaaq.
Nunalerinermut, Imminut Pilersornermut, Nukissiuuteqarnermut Avatangiisinullu Naalakkersuisoq Kalistat Lund pisortatigoortumik taamatut oqarpoq.
- Aalajangernerput siunissami ukiorpassuarni atugarisinnaasussaavarput.
Inuiaqatigiit aningaasaqarnerannut allannguissasoq
Svend Hardenberg, Inuit Development Company A/S-imi pisortaanerusoq Tasersiasimi erngup nukinganik nukissiorfiliortoqarniarneranut atatillugu suliffeqarfiup pilersaarutaa pillugu qaammammi matumani siusinnerusukkut saqqummiussivoq.
Pisortaanerup ilaatigut oqaatigaa, suliniut inuiaqatigiit aningaasaqarnerannut allannguissasoq. Tassa pilersaarutit malillugit ingerlasoqassappat.
Inuit Development Company A/S misissueqqarnissamut akuersissummik pissarsisimavoq, taannalu tunngavigalugu pilersaarut miliuunilikkaanik nalilik saqqummiussimallugu.
Pisortaanerulli nalunngilaa, Naalakkersuisut suliniut pitsaanerpaamik qulakkeerniarlugu erngup nukinganik nukissiorfiliorsinnaasunut suliariumannittussarsiortoqarnissaanik kissaateqartut.
Ingerlatseqatigiiffiit arlallit soqutiginnittut
Svend Hardenbergip tusagassiorfimmut matumunnga oqaatigisimavaa, Inuit Development Company A/S-imit unammisitsinissamut peqataanissamik pilersaaruteqartoqanngitsoq.
Taassuma unammeqataaniannginnermut tunngavilersuutigisimavaa, suliffeqarfiup piffissarujussuaq isumalluuterpassuillu pilersaarusiornermut atorsimagai, tassa unammisitsisoqarnissaa suli ilisimaneqanngitsorli.
Svend Hardenberg salliutinneqarusuppoq. Taamaattoqarsinnaanngilarli. Nunalerinermut, Imminut Pilersornermut, Nukissiuuteqarnermut Avatangiisinullu Naalakkersuisoqarfiup unammisitsinissaq tamanut atuuttoq erseqqissaassutigaa.
Naalakkersuisoqarfimmit ilisimatitsissutigineqarpoq, ingerlatseqatigiiffiit arlallit Kalaallit Nunaanni erngup nukinganut isumalluutit annersaannik atuinissaq pillugu unammilleqatiginnermut peqataanissamut soqutiginninnerminnik takutitsisimasut.
Unammilleqatigiissitsinermi Kalaallit Nunaata aningaasaliisussamut, suliassamik pitsaanerpaamik saqqummiussisumut, aammalu Kalaallit Nunaannut pitsaanerpaamik isumaqatigiissuteqarfiusussamut isumaqatigiissuteqarnissaa anguneqassaaq.
Naapertuuttumik ersarissumillu ingerlatsisoqassasoq
Ingerlatseqatigiiffiit arlaannaalluunniit maannamut isumalluutinik atuinissamut akuerineqarsimanngillat; 2024-mi unamisitsinermi ajugaasoqarpat tamanna aatsaat pisussaavoq.
Kalistat Lundip ilisimatitsissutigaa, akuersissutit mannamut tunniunneqarsimasut misissueqqaarnissamut taamaallaat tunngassuteqartut. Taakkulu tamatigut kisermaassisinnaatitaaffiusanngitsut.
Toqqaaniarnermi suliassarpiaat aatsaat 2023-p qiteqqunneraniit aallartissapput aammalu 2024 ilanngullugu ingerlassallutik. Suliassaq oqaloqatigiinnernik tunngaveqarluni unammisitsinertut ingerlanneqassaaq, tassanilu ingerlatseqatigiiffiit tamarmik naapertuuttumik ersarissumillu pineqassapput naliliiffigineqartassallutillu.
Tamatuma kingorna unammilleqatigiissitsilluni neqerooruteqartitsinermi ajugaasup suliap isumannaanneranut uppernarsagaalluarneranullu uppernarsaaffiusumik misissuinermut ukiut marluk pingasullu missaat atussavai. Ajugaasup suliamik uppernarsaanissani iluatsinngippagu, Kalaallit Nunaanniit suliaq taanna ingerlateqqinneqassanngilaq, taamaalillunilu suliassamik nutaamik ujartuisoqassaaq.