Kalistap pingaartilluinnagaa

Kalistat Lundip avatangiisit pingaartilluinnarpai, Kalaallit Nunaatalu erngup nukinganik nunarsuarmut tamarmut atugassiinera tulluusimaarutigalugu.

Nuup Kangerlussuullu akornanniittuni Tasersiami aamma Tarsartuup Tasersuani erngup nukinganik isumalluutinik iluaqutiginninnissamik pilersaarutit Nunalerinermut, Imminut Pilersornermut, Nukissiuutinut Avatangiisinullu Naalakkersuisup, Kalistat Lundip (IA) pingaartilluinnagarai.

Aviisi Sermitsiaq allappoq.

Avatangiisinik pingaartitsilluinnarpoq, Kalaallit Nunaatalu nunarsuarmut ikummatissanik atuiffiunngitsumut tapersiissuteqarsinnaaneranik tulluusimaarutiginnilluni.

- Nunarsuup kiatsikkiartornera tamanit eqqartorneqarpoq, maanilu Kalaallit Nunaanni sermit aakkiartornerisa immallu kissatsikkiartornerisa malitsigisaat aamma malugisinnaavavut. Taamaattumik ilatsiinnarsinnaanngilagut. Akisussaaqataanermik tigusisariaqarpugut, maannalu taamaaliorluta erngup nukingata iluaqutigineqanngitsup nunarsuup sinneranut neqeroorutigineratigut, Kalistat Lund Sermitsiamut oqarpoq.

- Tassuuna takutinneqarpoq akisussaaqataanermik tigusisugut aamma mingutsitsinngitsumik ingerlatsileriartuaarnermik pimoorussisugut – Kalaallit Nunaanniinnaanngitsoq aammali nunarsuarmi tamarmi. Tassami nunarsuaq tamakkerlugu unammilligassaavoq tamatumanilu Kalaallit Nunaat tapersiissuteqarsinnaavoq.

Aalisarnermut aarlerinartorsiortitsisoq

- Immap kissassusia allanngorsimasoq inuussutissarsiutitta pingaarnersaannut aamma aarlerinartorsiortitsivoq, taamaattumik unnuakkut toqqissilluta sinissinnaassagutta silap pissusiata allanngoriartornerit pinaveersimatinniarlugit sapinngisatsinnik tamanik iliuuseqartariaqarpugut. Imaaliallaannarmi inuiaqatigiinnut najugarisatsinnut toqqissimanartunut nuannersunullu eqquisinnaavoq.

- Avatangiisit pingaartilluinnarpakka, meeqqannut ernuttannullu sunniuteqarmata. Silarsuaq pitsaanerusoq taakkununnga tunniuttussaavarput, Kalistat Lund, pingasunik meeraqarlunilu tallimanik ernutaqartoq, oqarpoq.

Oqaluttuaq tamaat Sermitsiami sapaatip-akunnerani matumani saqqummersumi atuaruk, ugguuna akiliillutit iserfigisinnaavat:

Powered by Labrador CMS