Kalerrisaarutinik pilersaarusiorneq ilungersunartoq
Karrat Kangerluanni kalerrisaarutinik patajaatsunik amigaateqarneq innuttaasut qimagussornissaanut kalluaavoq. Kalerrisaarutimik pilersitsiniarneq ilungersunarluinnartoq, politiit ulapungaarsimanemi naliliineranni atuarneqarsinnaavoq.
Karrat 3 sisuussagaluarpat Uummannap sulluani innuttaasut taamaallaat minutsit arlalialunnguit atorlugit qimangussuunneqarnissaminnut piffissaqarput. Tassaarsuaqarsinnaaneranut upalungaarsimanermut politiit naliliinerani erserpoq, kalerrisaarutit inunnut ataasiakkaanut tunnganngitsut amigaataalluinnartut. Maannamummi taamaallaat immamik alapernaarsuisunik Niaqornani Qaarsunnilu pigaartoqarpoq. Pigaartulli qimarngutitsinissamut akuersissummik upalungaarsimanermut suliaqartuniit peqqaartussaapput.
Peqquteqanngitsumik kalerrisaarisoqarsinnaanera
Teknik atorlugu kalerrisaarinerit marluusut GEUS paasissutissiivoq. Siulleq tassaavoq qaqqap saneraaniit nikinneri uuttortarneqarnerinit sisoortoqannginnerani kalerrisaarisinnaaneq. Taanna periuseq Norgemi atorneqartarpoq, kisiannili kalerrisaarinerit pisariaqanngitsut amerlasooriarluni aallartinneqarsinnaallutik.
Kalerrisaarinerit aappaat tassaavoq qaqqaq sisoorpat aatsaat kalerrisaarineq. Kalerrisaarineq taanna qularnaatsumik paasisaqarfiussaaq, kisiannili tassaarsuarmik eqqugaasussanut ulorianartorsiortitsisinnaalluni. Teknik atorlugu kalerrisaarinerit marluk atorneqassappata sivikinnerpaamik qaammatini qulingiluani piareersarneqassasut, upalungaarsimanermi politiit naliliineranni erserpoq. Kalerrisaarutissanik ikkussuisoqarnerani aningaasartuuteqarnissaq pisariaqassasoq, politiit paasissutissiipput.
Qimangussuutitsinissat akuerineqassapput
Imaq tinerujussuarpat mallilluunniit angisuut takkutilerpata pigaartut qimarngutitsisoqarnissaanut upalungaarsimanermut suliaqartunut kalerreeqqaartussaapput. Taakkualu akuersiteqqaarnagit qimarngutitsineq aallartinneqarsinnaanngilaq. Karrat 3 sisuussappat unammilligassat takkua ilagaat. Qaqqaq anginerusoq sisoorpat piffissaq qimagussornissamut piffissaritinneqartussaq innuttaasut qimagussornissaanut aalajangiisuulluinnarpoq.