isumasioqatigiinneq
Kalaallit USA-mi allaffeqarfeqarnerat DF-imit eqqumiigineqarpoq
Sooq Naalakkersuisut Washington D.C-mi allaffeqarfeqarnersut Nunanut allanut ministeri Martin Lindegaard isumasioqatigineqassaaq
Namminersorlutik oqartussat Washington DC-mi sooq Kalaallit Nunaat aallartitaqarfeqassanersoq nunanut allanut ministeri Martin Lidegaard Radikale Venstreneersoq Dansk Folkepartimit Søren Espersenimit isornartunik tallimanngornermi usumasioqatigineqarnerani apersorneqassaaq.
Kristelig Dagblad allappoq.
Namminersorlutik oqartussat Washington DC-mi aallartitaqarfeqalernissaat ukioq kingulleq nalunaarutigineqarpoq, Kalaallit Nunaata Sinniisoqarfiani Danmarkimi pisortaq Adam Worm JyllandsPostenimut ilaatigut ima oqarpoq: 'Nioqquteqarnerit kisimik sammineqartassanngillat, Kalaallit Nunaatali nammineerluni nunanut allanut soqutigisani nammineerluni suliarisassavai', namminersornermulli inatsip iluani sulisoqassasoq oqaatigineqarluni.
Taama oqartoqarnera pissutaalluni Dansk Folkepartiminngaannit Søren Espersenip nunanut allanut ministeri Martin Lidegaard isumasioqatiginiarpaa, Folketingimi Kalaallit Nunaat pillugu ataatsimiisitaliaani ingerlanneqassalluni. Isumasioqatigiinneq aqagu tallimanngornermi ingerlanneqassaaq.
- Nuna namminiinngitsoq nunami allami allaffeqalernera Naalagaaffiup nunanut allanut attaveqarneranut iliuuserisartagarput allanngortinneqarpoq. Tamanna akuersaarneqarsinaanngilaq, Søren Espersen Kristelig Dagbladimut oqarpoq.
Kalaallit Nunaannit aallartitat qanoq suullu suleriuserissaneraat Søren Espersenip isumasioqatigiittoqarnerani apeqqutiginiagaasa ilagai.
Isumasioqatigiinneq Sermitsiaq.AG-mit malinnaaffigineqassaaq.