Amerikap Nunavissuani pissartanngorniunneq
Kalaallit unammineri toqqaannartumik isiginnaakkit
Amerikap Nunavissani Pissartanngorniunnermit toqqaannartumik aallakaatitsisoqassaaq
Pilersaarutit malillugit pisoqassappat Uruguay-mi Amerikap Nunavissuani pissartanngorniunnermit unamminerit TV-kut toqqaannartumik aallakaatinneqassapput.
Uruguay-p illoqarfiisa pingaarnersaanni Montevideo-mi uruguay-p qalipaatai tungujortoq qaqortorlu takussaasorujussuupput. Biilit amerlasuut erfalasulerlutik angalapput. Erfalasut atisallu timersuutit tungujortunik qaqortunillu qalipaatillit sumi tamaani tuniniagaapput. Tupaallannanngitsumik tuluujuk 10-mik normulik nuannarineqarnersaavoq, allagartaqarrajuttarpoq Suarez. Soorunami pineqarpoq arsaattartoq Uruguay-mi tusaamasaq Liverpool-imilu unammisartoq Luis Suarez. Assammik arsarnerunngitsoq, arsaannerli ulluni makkunani Uruguay-mi sammineqarpoq. Uruguay-p marlunngorpat unamminermi aalajangiisuusumi Italia unammissavaa, Brasiliami nunarsuarmi pissartanngorniunnermi 1/8-finalimut anngunniullutik. Uruguay ajugaassappat Montevideo-mi festatissapput.
Caneleones-imi, Montevideo-mit akunneq ataaseq biilerluni ungasissusilimmi, arsaannerinnaq sammineqanngilaq. Aamma assammik arsarneq sammineqarpoq. Amerikap Nunavissuani Pissartanngorniunneq ataasinngorpat aallartissaaq, kalaallillu unammeeqqaassapput ataasinngormat nunatta nalunaaqutaa malillugu 19.00, Estadio Sergio Matto-mi.