Kalaallit sukkornermik nappaateqalersinnaanermut immikkut ittumik sananeqaateqarnerat timigissarnikkut annikillisinneqarsinnaavoq
Kalaallit Nunaanni innuttaasut fire procentiisa missaanniittut diabetes 2-mik taaneqartartumik sukkornermik nappaateqaleriaannaapput, immikkut ittumik allanngorsinnaasumik sananeqaateqarnertik pissutigalugu. Ilisimatusarnerup takutissimavaa, ullormut nalunaaquttap akunnerani ataatsimi timigissartarnikkut sukkornermik nappaateqalersinnaaneq annikillisinneqarsinnaasoq.
Kalaallit Nunaanni Danmarkimilu ilisimatuut paasisimavaat, timimik annikikkaluamilluunniit atuisarneq sananeqaatip immikkut ittup peqqissutsimut ajortumik kinguneqarsinnaaneranik ingalassimatitsisinnaasoq, tusagassiorfinnut nalunaarummi allassimavoq.
- Paasisavut nuannaarutigisupilussuuagut, taakkumi issittumi inuppassuit diabetes 2-mik nappaatillit inuunerannut pitsanngorsaataasinnaapput, Torben Hansen Københavns Universitetimi Novo Nordisk Foundation Center for Basic Metabolic Researchimeersoq (CBMR) oqarpoq.
Amerleriarujussuarsimasut
Ukiut kingulliit 25-t ingerlaneranni kalaallit diabetes 2-mik nappaateqalersartut amerleriarujussuarsimapput. Ilisimatuut 2014-imi paasisimavaat, innuttaasut fire procentiisa missaannittut immikkut ittumik allanngorsinnaasumik sananeqaateqartut, TBC1D4, tassannga sananeqaatillit aap sukkoqarneranik aqutsiuminaatsitsisarput.
Ajorluinnartumik pisoqassappat inuit pineqartut sianiutimikkut ajoquteqalersinnaapput, tappigersinnaallutik uummatimikkullu nappaateqalersinnaallutik, nalunaarummi allassimavoq.
Ilisimatusarneq kingulleq tunngavigalugu, allanngortartumik sananeqaatillit aammik sukkuinik pitsaanerusumik nakkutiginninnissaannut timimik atuineq iluaqutaasinnaanersoq misissorneqarsimavoq. Ilisimatuut ilaatigut Kalaallit Nunaanni innuttaasunik siusinnerusukkut misissuisarsimanernit kalaallit 2.665-it pillugit paasissutissat atorlugit misissuisimapput
Eqqornerusumik katsorsaaneq
- Paasisatta timigissarnikkut eqqornerusumik katsorsaasoqarsinnaanera ammaappaa. Tamanna inuit assigiinnik marlunnik allanngortartumik sananeqaatillit 3,8 procentiinut iluaqutaasinnaavoq, postdoc Therisia Schnurr CBMR-imeersoq oqarpoq.
Ilisimatuunit neriuutigineqarpoq, timigissarneq inunnut immikkut taamatut sananeqaatilinnut pingaaruteqarsinnaannera paasiniarlugu kalaallit akornanni timigissaalluni misiliisoqarsinnaassasoq.
- Ilisimatuulli isumaqarput, Kalaallit Nunaanni sananeqaatip allanngortartup atugaaqisup malitsigisaanik issittumi inunnut tuusintilikkaanut sukkornermik nappaatilinnut angusarigallakkatik pitsaasumik iluaqutaasinnaassasut, tusagassiorfinnut nalunaarummi allassimavoq.
Ilisimatusarsimasut
Det nye studie er blevet til i et samarbejde mellem Torben Hansenip ilisimatusartui, Kalaallit Nunaanni Ilisimatusarfik, Syddansk Universitetimi Statens Institut for Folkesundhed kiisalu Steno Diabetes Center Copenhagen suleqatigiillutik ilisimatusarsimapput. Ilisimatusarnermi angusat ilisimatuussutsikkut atuagassiami Diabetologiami saqqummiunneqaqqammerput.