Kalaallit savalimmiormiut unammillerpaat

Kalaallit Nunaat aamma Savalimmiut futsalimi novemberip 29-at, 30-at kiisalu decemberip aallaqqaataani pisortatigoortumik Nuummi unammissapput. Siullermeerutaasmik arsaateriaatsimi futsalimi kalaallit pisortatigoortumik nunamut allamut unammissapput arsaateriaaserlu taanna nunarpassuarni unammissutaasarpoq.

Atuaruk: Savalimmiunut unammilerput

Kalaallit arsaattartut silami nunanut allanut unammisarnerat akuttusuumik pisarpoq angalaniarnermut aningaasartuutit qaffasinerat pissutigalugu. Futsal allanik periarfissiivoq arsaaffimmi iligiit ataatsit tallimakkaarlutik isersimasaramik.

- Arsaattartoqarneq tassuuna siuarsarniarlugu suliniutit ilagaat. Naluneqanngitsutummi arsaattarneq ukiup annersaani illup iluani ingerlanneqartarpoq, taamaalillunilu pimoorukkaanni nunanut allanut nallersuussinnaanngornissaq periarfissaammat. Taassuma malitsigisussaassavaa unammiuaarnerit nunatsinni aamma pisalernissaat. Klubbit eqqarsaatigalugit, aammalu minnerunngitsumik nunanut allanut unammisarneq nunatsinni takussaanerulernissaa. Ulloq manna tikillugu nunatsinni periarfissaanikuunngilaq arsaattartut nunanut allanut unammisut ”angerlarsimaffimminni” isiginnaassallugit. Nunanut allanut unamminerit pisarput nunatta avataani, GBUp siulittaasuata tullia John Thorsen nalunaarpoq.

Savalimmiuniit arsaattartartut Nunatsinnukartinnerat akikitsuinnaanngilaq. Aningaasartuutit matussusernissaat iluatsippoq Elite Sport Greenland suleqatigalugu.

Nuummi arsaattartut klubbiisa suleqatigiiffiat Nuuk Boldspil Union unamminerit ingerlanissaannik aqutsisuussaaq.