Skip to main content

Kalaallit sakkutuujusimasut PTSD-mik nappaatillit nappaataat akuersaarneqartoq

Kalaallit sakkutuujusimasut sorsuffiusuniittarnerminni tarnimikkut nappaateqalersimasut immikkut ittumik inatsimmut ilaatinneqarput.

Sakkutuujusimasut kingusinnerusukkut nappaateqalersut imaluunniit stresseqalersut taarsiiffigineqarsinnaapput, tassa aamma kalaallit Kalaallillu Nunaanni najugallit. Peter Hummelgaardip (Soc) Aaja Chemnitz Larsenip (IA) apeqqutaanut akissutaani tamanna takuneqarsinnaavoq.

Folketingimi immikkut ittumik inatsit 2014-imi akuerineqarpoq, taanna aqqutigalugu sakkutuut allallu naalagaaffimmi atorfillit sorsuffiusuniinnerminni PTSD-mik nappaateqalersimasut nappaataat sulinermi ajoqusernertut akuerisaavoq, aamma sorsuffiusumiissimanermit piffissarujussuaq ingerlareersoq napparsimalersimagaluarpataluunniit.

Aaja Chemnitz Larsenip apeqqutigisimavaa, inatsit taanna Kalaallit Nunaannut atuutsinneqarnersoq. Apeqquteqarnissaa pisariaqanngikkaluarpoq, Peter Hummelgaard oqarpoq.

- Inatsit immikkut ittoq atuutsinneqarpoq, sakkutuunut naalagaaffimilu atorfilinnut allanut, atorfeqarnerminnut atatillugu minnerpaamik ataasiarlutik sulinerminnulluunniit atatillugu sorsuffiusuniissimasunut, eqqissisitsiniaasimasunut, inunnik ikiuiniarnernut assigisaannullu peqataasimasunut. Tamanna aamma kalaallinut, danskit naalagaaffiata aqutaani, tassunga ilanngullugu Illersornissaqarfimmi peqataasimasunut atuuppoq, akissuteqaammi allassimavoq.

Ministeri taamaammat isumaqarpoq allamik inatsisiliortoqartariaqanngitsoq.

Sakkutuujusimasut 100-ngajaat Kalaallit Nunaanni najugassasut missiliorneqarpoq.

Inatsit immikkut ittoq akuerineqarmalli, sakkutuujusimasut 700-t missaanniittut PTSD sulinermi ajoqusernertut akueritissimavaat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER