Rubinisiorneq
Kalaallit rubiniutaat siulliit juullertinnagu piareersinnaasut
Aappaluttumi piiaaffik sapaatip akunnerata tulliani ammaleriikatappoq
LNS Greenland Gems rubininik tunisassiornermik piaartumik aallartitsinissamik pilersaarummik piareersimatitsivoq.
- Sapaatip akunnerata tulliani sanaartornerup naammassiniarneranut sulineq aallartissallugu naatsorsuutigaarput, ingerlatseqatigiiffiup siulersuisuini siulittaasoq Gunnar Moe oqarpoq.
Atuaruk: Aappaluttumi rubinisiorfik annaanneqarpoq: Ulloq nuannaarfiusoq
Aningaasaliissutit inissipput, taamaattumillu kalaallit rubiniinik juullertinnagu piaasoqarsinnaanera taassuma naatsorsuutigaa.
Atuaruk: LNS Greenlandip rubinisiorfik akiliisinnaajunnaartoq tiguaa
Naak pilersaarutit piareersimareeraluartut, Naalakkersuisusullu akuersinissaat naammassiinnagassaarpasikkaluartoq, Gunnar Moe pissangangaatsiarsimalluni oqaluttuarpoq.
- Taamaattumik ullumikkut ulloq, uagutsinnut Kalaallit Nunaannullu nuannaarfiuvoq, taanna oqarpoq.
Aatsitassanut naalakkersuisup, Randi Vestergaard Evaldsenip (D) piaaffiup annaanneqarnerata iluatsinnera nuannaarutigaa.
- LNS Greenland Gems A/S-ip taama sivikitsigisumik periarfissaqartinneqarluni True North Gems Greenland A/S-ip pigisai tigummagit naammagisimaartorujussuuara, taamaalilluni Aappaluttumi rubinisiorfissaq ingerlaqqissinnaalerluni, taanna tusagassiuutinut nalunaarummi allappoq.