Kalaallit Røde Korsiat nutaamik siulittaasortaarpoq
Kalaallit Røde Korsiat ataatsimeersuaqqammerpoq, tassani nutaamik siulittaasumik toqqaasoqarpoq.
Ataatsimeersuarnermi nutaamik siulittaasumik toqqaasoqarpoq. Tassani Mia Rosing Nilsson siulittaasutut toqqarneqarpoq.
Angalanermut malittarisassat massakkumut atuuttut pissutigalugit naapinneq allatut piviusunngortinneqarpoq, taamaalillutillu kajumissutsimik sulisugut sinerissamiittut internetsikkut ataatsimiipput. Nina Kreutzmann Jørgensen siulittaasuujunnaarpoq, siulersuisunili ilaasortaaginnassaaq. Tassami siulittaasup tulliatut ingerlaqqissaaq, tusagassiutinut nalunaarutigineqarpoq.
- Pissanganartorujussuuvoq suliniaqatigiiffimmi Røde Korsimi suleqataalluni, nunarsuaq tamakkerlugumi inunnik ikiuiniaqatigiinni ilaavugut. Tulluusimaarutigisarpara Nunatsinni aningaasatigut namminersortumik Røde Korsimi immikkoortortaqarfeqaratta, kajumissutsimik sulisut pikkorissut piumassuseqarluartullu peqatigalugit. Qilanaaqaanga nuna tamakkerlugu siulersuisut nutaat, immikkoortortaqarfiit allallu Røde Korsimut tapersersersuisut suleqatigilernissaannut, siulittaasunngortoq oqarpoq.
Ataatsimeersuarnermi peqatigiiffiup ukkiunut marlunnut anguniagassai eqqartorneqarput aalajangiunneqarlutillu. Sinaakkutit eqqartorneqartut tassaapput nuna tamakkerlugu siulersuisut illoqarfikkaartumillu immikkoortortaqarfiit sinaakkutissaat. Nuannaarutigeqaarpullu amerlasuut peqataammata. Kalaallit Røde Korsiannit aallartitat illoqarfinnit ukunaneerput: Ilulissat, Aasiaat, Sisimiut, Maniitsoq, Nuuk Tasiilarlu.
Nuna tamakkerlgu siulersuisut:
Nuna tamakkerlugu siulersuisoq Mia Rosing Nilsson, Nuuk.
Siulittaasup tullia: Nina Kreutzmann Jørgensen, Nuuk.
Siulersuisuni ilaasortat: Camilla Laudrup, Nuuk aamma Mette Scharling Laursen, Maniitsoq. Sinniisut: Jens Peter Møller, Sisimiut aamma Lisbeth Kreutzmann Petersen, Maniitsoq