Kalaallit Røde Korsiat immikkuullarissumik ikiuunniarpoq
Kalaallit Røde Korsiat coronap ajornartorsiutaanerani ikiuuttartunik pilersitsivoq. Ikiuuttartut inuit angerlarsimaannartussanngorallartut ikiortassavaat. Ikioqatigiinnissamik siunertaqarlutik eqimattaliortut Facebookimi aamma amerliartorput.
Coronap ajornartorsiortitsinerata nalaani kajumissutsiminnik ikiuukkusuttorpassuupput.
Kalaallit Røde Korsiat kajumissutsiminnik ikiuukkusuttut ikiorneqartariaqartullu imminnut attaveqarfigisinnaasunngorlugit attaveqaqatigiiffimmik pilersitsivoq.
Facebookimi eqimattat ikioqatigiiffiusinnaasut arlallit aamma pilersinneqareerput, angerlarsimaannarnissamik innersuunneqarsimasut pisiniunneqarnissaat ajornannginneruniassammat.
- Ajunngitsuliornerpassuit ingerlareersut Kalaallit Røde Korsiata tapersersorusuppai, ikiorneqartariallillu tamarmik ikiorneqarnissaannut qulakkerinneqataarusulluni. Taamaattumik Nuummi Røde Korsi ataqatigiissaarilluni inuillu ikiortariaqartut sumiinnerinik suliaqarluni aallarteruttorpoq. Røde Korsip qulakkeerusuppaa ikiuineq toqqissisimanartuussasoq, Kalaallit Røde Korsiat tusagassiutinut nalunaaruteqarluni allappoq.
Ikiortissaqarpoq
Nuummi inuit nappaammi Covid-19-imik napparsimasut qulit paasineqareerput, Nuummilu ikiuisussat ataatsimoorfiat maanna pilersinneqarpoq. Pisariaqartitsisoqassappalli illoqarfinni Ilulissat, Aasiaat, Maniitsoq, Qaqortoq, Nanortalik aamma Tasiilaq kajumissutsiminnik suliaqartoqareerpoq, allassimavoq.
- Siullermiilinngilagut ulluni artortnartuni inuiaqatigiittut ataatsimoorluta, pisariaqartitsisunut
ikiuunnissatsinnut piareersimavugut. Inuppalaassuseq ataqatigiinnerlu inuiaqatigiinni nukittuffigivarput. Kalaalit Røde Korsiat suliniutinut massakkut pioreersunut tapersersueqataarusuppugut inuiaqatigiinnut amerlanernut suli ikiuussinnaarusulluta. Ataqatigiissaarinertaanut tunngasut tigumminissaanut piareersarnikuugatta Ikiuuttartut pilersippagut, Kalaallit Røde Korsianni siulittaasoq, Christina Tønder Bell oqaaseqarpoq.
Uku ikiorneqarsinnaapput
Kalaallit Røde Korsiat ilisimatitsivoq, innuttaasut angerlarsimaffimminni mattusimasut, soorlu utoqqaat, inuit aningorneqarsinnaanngitsumik nappaatillit allallu timikkut akiuussutissakinnerusut virusimik tunillatsinnissaminnut qaninnertut nalineqarnikuusut ikiorneqarsinnaasut. Nappaat Covid-19 taakkua inuunerannut ulorianartorsiortitsilersinnaavoq.
Kajumissutsiminnik ikiuuttut pisiniussisinnaapput, nakorsaatinilluunniit aalliussillutik.
Inuit ikiorneqarnissamik pisariaqartitsisut, inuillu ikiuukkumasut, ulluinnarni nalunaaqutaq 13-15.00 akornanni mailimut ikiuutta@krk.gl-imut attaveqarsinnaapput imaluunniit uunga sianerlutik 232544.
Suliffeqarfiit ikiuukkumasunik allatigulluunniit tapeerusuttut allaffimmut mailimulluunniit taaneqartumut saaffiginnissinnaapput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...