ilisimatusarneq
Kalaallit qimmii ilisimatuussutsikkut misissorneqalersut
Qimussertarnerup oqaluttuassartaa qimmillu kinguaarinnii pissusaat 2020-ip tungaanut ilisimatuussutsikkut misissorneqassapput
Qimmit qimuttut 30.000-it missaanniipput ukiut 20-t matuma siorna, 15.000-illu maannakkut inorlugit.
Ineriartorneq taamatut ingerlaannassappat kalaallit qimmiisa nungunnissaat aarlerinarsissaaq. Qimmeqartarneq oqaluttuassaallu taamaattumik ilisimatuussutsikkut misissorneqalerput.
Ilisimatuussutsikkut misissuineq danskinit kalaallinillu suliarineqartussaq taaguuteqarpoq 'Qimmeq', danskit aviisiat Politiken sapaammi aallappoq.
Ilisimatuussutsikkut misissuineq million koruuninik taperneqarpoq. Qimmeqartarneq nungusaataanngitsumik qanoq ingerlanneqarnissaa kiisalu atuarfinni ilinniutitut atorneqartalernissaa sulissutigineqassaaq. Oqaluttualiortoqassaaq, saqqummersitsisoqassaaq Unesco-milu ilaalernissaa aamma sulissutigineqassalluni.
- Qimmit qanoq pitsaanerpaamik ikiliartunnginnissaat sulissutigineqarsinnaanersoq misissorneqassaaq, suliami aqutsisoq Morten Meldgaard Politikenimut oqarpoq.
Misissuinermi inernerit meeqqat atuarfiini kiisalu innuttaasunut paasissutissanngorlugit suliarineqassapput.