Kalaallit Puerto Ricomut ajugaapput - pissartanngorniunnermi ullumi unammeqqissapput

Amerikap avannarlermiuisa Caribiamiullu pissartanngorniunneranni kalaallit arnartaat
arfinilinnik pointinnapput, unamminerni aallarniutaasuni ajugaasuullutik.
Unammersuaarneq USA-mi Chicagomi ulluni makkunani ingerlanneqarpoq.

Puerto Ricomut marlunngormat unamminnginneranni aalajangerneqareerpoq, kalaallit
Puerto Ricolu pissartanngorniunnermi, ullumi pingasunngornermi ingerlanneqartussami,
unammisussaasut. Tamarmimmi unamminerni siullerni Mexico aamma USA
ajugaaffigereerpaat.

Sungiusaasoq tulluusimaarpoq

Puerto Ricomut ippassaq marlunngornermi unamminermi kalaallit arnartaat 26-23-mik
ajugaapput, unamminermi Aviana Kajangmat arfineq marloraarluni isertitsinersaalluni.

Unammilinnginnerminni kalaallit nunanut allanut unammisartunut sungiusaasuat Anders
Friis ima kattuffiup facebookimi qupperneranut oqarpoq:

- Pissartanngorniunnissamut anngunnerput tamatta tulluusimaarutigeqaarput.
Pissartanngorniunnermut anngutereeraluarluta unamminerit tamaasa ajugaaniartassavagut.
Aamma ullumi ajugaaniarsarissaagut. Pisarnertut piareersarluassaagut. Unammineq
pingaaruteqanngikkaluartoq' misileraaffigissavarput, unammersuaarnermi unammisartut isersimarpiarnikuunngitsut unammitissallugit.

Ajugaasut VM-imut anngutissapput

Amerikap avannarlermiuisa Caribiamiullu unammersuaarneranni pissartanngorniunneq
unnugu unammissutigineqassaaq. Kalaallit Nunaat aamma Puerto Rico
pissartanngorniunnermi unamminerat, Nunatta nalunaaqutaa malillugu, nalunaaqutaq
22.00 aallartissaaq. Unamminermi ajugaasut VM-imut, Spaniami decembarimi ingerlanneqartussami, anngutissapput.

Kalaallit arnartaat ataasiarlutik VM-imut peqataanikuupput, tassami 2001-mi VM-imut
peqataagamik.