Kalaallit pissanganartuliaat inersuarnik ulikkaartitsisoq
Nordatlantiske Filmdageni sisamariarluni ulikkaaqqasumik takutitsinerup kingorna Malik Kleistip pissanganartuliaa Alanngut Killinganni, danskit filmertarfiini arlalinni uani sapaatip akunnerani siullermeerluni takutinneqalerpoq.
Malik Kleistip pissanganartuliaa Alanngut Killinganni, Nordatlantisk Filmdagemi tigulluarneqaqaaq.
Nordatlantens Brygge, festivalimik 2.-12. marsimi ingerlanneqartumi aaqqissuisuusoq taama ilisimatitsivoq.
Tigulluarneqarnera pissutigaulgu festivali filmimik saniatigut takutitsinermik aaqqissuussaqarpoq, aammattaaq Århusimi aamma Ålborgimi immikkut takutitsipput. Takutitsinernilu tamani ulikkaartoqarnera nalunaarutigineqarpoq.
Ilitsersuisup Malik Kleistip Nordatlantiske Filmdage 2023, Københavnimi Nordatlantens Bryggemi peqataaffigalugit filmi oqaluttuaraa.
Filmertarfinni arlalinni takuteqqaarneqassasoq
Ulluni tulliuttuni filmi danskit filmertarfiini soorlu Empire Biomi Københavnimi, Øst for Paradisimi Århusimi aamma Aalborgimi Biffenimi kiisalu allani takuteqqaarneqassaaq.
Kalaallip Bill Beringip siammarteriviata nutaap 'Tullut', pissanganartuliap ukiaq nunatsinni takuteqqaarneqartup Danmarkimi siammarterneqarneranut isumaginnittuuvoq.
Alanngut Killinganni Kalaallit Nunaanni filmini tunisaanerpaasup, Malik Kleistip qiiaammisaarnartuliaata Qaqqat Alannguisa tulleraa.
Filmimi Angunnguaq Larsen, maanna Oscarimut innersuunneqartumi 'Ivalu'-mi maanna peqataasoq aamma tassani ilaavoq. Taassuma takornariartitsisartoq Tuuma inuttaaffigaa, tassanilu piumanani danskit takornariartut sumiiffimmut tusaamanerlutaasumut angallappai, tassani ilinniarnertuunngorlaat arfinillit qivittumit peqqarniitsumik saassunneqarsimapput.