Kalaallit pingajorarterutaat taqqakkut milittoorataasinnaasut
Kalaallit pingajorarterutaat kingornuttakkamik taqqakkutmilittoorutaasinnaasumik aavi kolesterolimik annertuallaamik akoqartut,misissuinerit nutaat takutippaat. Taamak amerlatiginerat tupaallannartoq, ilisimatusartoq isumaqarpoq.
Innuttaasut pingajorarterutaat kingornuttakkamik aavi kolesterolimik akoqarpallaartut,
taqqat qalipperlutik qerattarnerisigut uummatip qaratsallu taqaagut milittoorsinnaanermut
aarlerinartorsiornerusut, Kalaallit Nunaanni innutaasut peqqissusaannik misissuisitsinerit
takutippaat.
Nunatsinni Inuunerissaavik Steno, misissuisitsisimasoq taamatut allappoq.
Kalaallit inersimasut 4000-inik amerlanerusut misissuinerminut peqataasimapput.
Nunatsinni nakorsaanerup ilisimatuullu Marit Eika Jørgensenip inuit taamak amerlatigisut aavisa kolesterolimik akoqarpallaarnerat taqqamikkullu milittooratarsinnaanerat tupaallaatigisisimavaa:
- Kalaallit Nunaanni inuit amerlasuut LDL-kolesteroleqarpallaarnerat ilisimareerparput,
amerlassusaalli uissuummissutigaarput, Nunatsinni Inuunerissaavimmi Stenomi nakorsaaneq ilisimatoorlu Marit Eika Jørgensen oqarpoq, nangillunilu:
- Misissuinermi paasisap kinguneraa siunissami – maannamiit suli annertunerusumik – kolesteroleqarpallaarsinnaanermut misissuisoqartarnissaa, LDL- kolesteroleqarpallaanillu nassaaraangatta ilaquttattaaq misissorneqarnissaannik aaqqisuussamik neqeroortassaagut, taanna oqarpoq.
Katsorsarneqarnissaa pisariaqartoq
Misissuinermi aap kolesterolimik akoqarpallaalernera – aap kolesteroleqarpallaarnerasut
ilaqutariinni kingornuttakkatut ilisimaneqartortaaq aallaaviuvoq. Aap kolesteroleqarpallaarnera kingornuttagaq, pinngoqqaatip- kolesterolip LDL-kolesterolimik taaguutillip tingummi arrortinneqarnissaanut aqutsisup- allannguuteqarneranik patsiseqarpoq, tamatuma LDL- kolesterolip aammiittup inunngornermiit annertoorujussuusanera nassataraa. LDL- kolesterol, kolesterolitut ajortutut navianartutullu taagorneqarajuppoq. LDL kolestorolip annertuallaarnera kingornuttagaq nakorsarneqanngikkuni taqqakkut militoornissamut aarlerinartorsiortitsinerussaaq.
Pinngoqqaammi allannguut innuttaasut peqqissusaannik misissuisitsinerni paasineqartoq,
naggueqatigiit inuit akornanni taamaallaat nassaassaavoq, Inuunerissaavimmit Stenomit tusagassiorfitsigut nalunaaruteqarluni ilisimatitsissutigineqarpoq.
- Maannamiit annertunerusumik misissuinerit nakorsaasersuinerillu 20-nik ukiulinni allaat pisariaqarsinnaanerat eqqumaffigissavarput, Marit Eika Jørgensen opqarpoq.
Nakorsaatit nerisallu
Kalaallit inersimasut 33 procentii angullugit kingornuttakkamik aavi kolesterolimik akoqarpallaartut taqqamikkullu milittooratarsinnaasut kitaamiut innuttaannit amerlanerupput. Ilaqutariinni kingornuttakkamik kolestroleqarpallaarneq innuttaasut nunanit killerneersut 1%-iinit ikinnerusuni nassaassaammat- annertuneroqaaq.
LDL-kolesteroleqarpallaarnermi, nerisat nakorsaatillu atorlugit nakorsaanikkut, uummatikkut taqqatigullu nappaateqalernissaagaluaq pinaveersaartinneqarsinnaavoq, Inuunerissaavimmit Stenomit ilisimatitsissutigineqarpoq.
Paarnanik allanillu naatitartornissaq, aalisakkanik orsulinnik karrinillu aseqqorluttunik akulinnik nerinissaq innersuussutaavoq. Nerisat sukkoqarpallaat tunnullillu ingalassimaniartariaqarput.