suleqatigiinneq
Kalaallit Nunatsinnut utertalernissaat anguniarlugu suliniut
Ilinniartut peqatigiiffiat Ili Ili aamma Danmarkimi kalaallit ilinniagaqartut peqatigiiffiat Avalak suleqatigiillutik suliniuteqalerput
Kalaallit Danmarkimi ilinniagaqartut peqatigiiffiat Avalak aamma Nunatsinni ilinniagaqartut peqatigiiffiat Ili Ili, Avalaap Future Greenlandimi ataatsimeeqataaneranut atatillugu Nuummiititaqarnerani ataatsimiipput.
Kalaallit Danmarkimi ilinniagaqareeraangata Nunatsinnut utertalernissaat anguniarlugu ataatsimut suliniartoqarnissaa anguniarpaat.
- Kalaallit Danmarkimi ilinniagaqareernermi kingorna affaannaat Nunatsinnut utertartut Aningaasaqarnermut Siunnersuisooqatigiit nalunaarusiaanni atuarneqarsinnaavoq. Tamanna allanngortinneqarnissaa pingaaruteqarpoq, Ili Ili-mi politikkikkut akisussaasoq Tukumminnguaq Olsen oqarpoq.
- Angerlarsimalluni pitsaaneruvoq. Kalaallit Nunaanni kikkut tamarmik atorfissaqartinneqarput.
Suliniutip piviusunngornissaa suli nalunarpoq. Nunani allani ilinniagaqareersimasut Kalaallit Nunaannut uternissaannut pitsaaqutaasinnaasut ujartorneqarput.
Amerlanerusut atorfissaqartinneqarput
Suliniut qanoq ilusilersorneqarsinnaanersoq siunnersuuteqartoqarsinnaanera Ili Ili-mit nalunaarutigineqarpoq. Aamma peqatigiiffiit allat suliniummut peqataasinnaanerat ammaffigineqarpoq.
Ili Ili aamma Avalak ataatsimeeqatigeeqqinniarlutik isumaqatigiissuteqarput. Avalaap siulersuisuinit Elsennguaq Silassen Nunatsinniippoq. Taanna Danmarkimut utissaaq tallimanngorpat. Oqaluuserineqarsimasut Avalaap siulersuisuinut saqqummiutissavai.