Kalaallit Nunannit sioqqat avammut niuerutitut
Kalaallit Nunaata kitaata sineriaa sinerlugu sioraqarfippassuaqarpoq. Nunarsuami sumiiffinni allani atorneqarsinnaassapput taamaalillutik Kalaallit Nunaanni aningaasaqarnermut iluaqutaallutik.
Nunarsuarmi sioraqarfiit ilarujussui imaarutilerput, sioqqallu piumaneqarnerujartorlutik. Kalaallit Nunaata sineriaani sioraqarfippassuaqarpoq, immaqalu avammut tunineqarsinnaapput taamaalillutik nunamut isertitsissutaallutik.
Nunanit tamalaanit Issittumi ilisimatuut peqatigalugit qallunaat ilisimatuut marluk Mette Bendixen aamma Lars Lønsmann Iversen atuagassiami Nature Sustainabilitymi allaaserisamik saqqummersitseqqammerput, tassani Kalaallit Nunaanni sioqqanut suliffissuarnik pilersitsinissami periarfissat aarlerinaateqarsinnaasullu allaaseralugit. Suliaat Carlsbergfondetimit aningaasalerneqarpoq.
- Siusinnerusukkut takuarput Sermersuup sukkasuumik aakkiartornera Kalaallit Nunaata sineriaani kinnerpassuarnik pilersitsiffiusoq. Ilammi sioqqat nunarsuup imaanut pisartut 8 procentiisa missaat Kalaallit Nunaanneersuupput. Silaannarlu kissatsikkiartuinnassappat naatsorsuutigisariaqarparput tamanna annertusissasoq, Mette Bendixen University of Coloradomi sulisoq oqarpoq.
Silaannaap kissatsikkiartornera sioqarnerulersitsivoq
Sioqqat ukiut tamaasa Kalaallit Nunaannut tunineqartut amerlassusaat niuerfimmi nunap BNP-ata affaanit qaffasinnerusumik naleqarput (14,5 milliard koruunit missaat). Nunarsuarmi sioqqat akia ilimagineqartutut qaffakkiartuinnassappat ukiut tulliuttut 25-t ingerlaneranni akia marloriaatinngorsimassaaq.
Sioqqat avammut niuerutiginissaannut periarfissaq pillugu Sermitsiami paasisaqarnerugit – uani ataani aviisimut isissutissarsigit: