Kalaallit nunani allani ilinniagaqartut: Affaasa missaanniittut nunatsinnut uteqqittarput
Kommuneqarfik Sermersuumit 2015-imi nunani allani ilinniagaqartut nunatsinnut uteqqinnissaannik pilersaarisoqarmalli susoqarpallaarsimanngilaq. Tamanna kisitsisit nutaat takutippaat.
Aasaanerani atuanngiffissinni nunatsinnut angerlarlusi suligitsi.
Kommuneqarfik Sermersuumit 2015-imi kalaallit Danmarkimi ilinniagaqartut neqeroorfigineqarsimapput, aasaanerani atuanngiffimminni ilinniakkaminnut attuumassutilimmik suliartornissamut siumut utimullu akiliunneqarnissamik.
Siunertaasimavoq inuusuttut Nunatsinni sulisarnermik paasisaqarnissaat, taamaalillutik piffissami ilinniagaqartut affaasa missaannaanniittut utertarneranni, ilinniakkaminnik naammassisimatillugitk nunatsinnut uterlutik suliartortalernissaat.
- Siunissami qanoq pisoqarumaarnersoq takussallugu pissanngatigisimaqaarput, kommunimi ilinniartitaanermut siunnersorti Malik Skifte oqarsimavoq.
Taamatut pilerisaarisoqarsimaneranit ukiut arfineq-pingasut qaangiummata pilerisaarisimaneq iluaqutaasimarpasinngilaq.
Ilinniagaqareernermi ukiut pingasut qaangiuttut
Naatsorsueqqissaatarfiup kisitsisaataasa kingulliit takutippaat, maanna 2015-imisut inissisimasoqartoq, ilinniartut ukiuni pingasuni ilinniareernermi kingorna angerlartartut 53 procentimiippoq.
2019-mi Nunatsinnut angerlartut 55 procentiupput, tassa affaat sinnerlugit. Ilinniakkalli naammassereernerani ilinniaqqittoqartarpoq.
Sermitsiaq.AG-mit ilinniartitaanermut naalakkersuisoq Peter Olsen, tamatumunnga qanoq isumaqarnersoq pillugu oqaaseqartinniarneqarpoq.