Tunngaviusumik inatsit
Kalaallit Nunaata tunngaviusumik inatsisissaa qaninnerulaalerpoq
2016-imi Inatsisartut ukiaanerani ataatsimiinneranni Naalakkersuisut tunngaviusumik inatsit pillugu isumalioqatigiissitaq pilugu nassuiaateqassapput
Namminersorneq pillugu inatsimmi paragraf 21 ersarippoq:
‘Kalaallit Nunaata namminiilivinnissaanik aalajangerneq inuiaat kalaallit aalajangernerannik tunngaveqassaaq.
Tamanna aamma imaappoq namminiilivinnissamut piareersaanerit sukkulluunniit inuiannit kalaallinit aallartinneqarsinnaasut – Danmarkimit avissaarnissaq ullulinngikkaluarlugu.
Inatsisartut ukiaanerani ataatsimiinneranni Siumumiit Jens Immanuelsen, Inuit Ataqatigiinniit Aqqaluaq B. Egede aamma Partii Naleqqamiit Per Rosing-Petersen assigiingajannik pingasunik siunnersuuteqarput tunngaviusumik inatsiseqalernissami piareersaasussanik isumalioqatigiissitanik pilersitsisoqarnissaanik.
Atuaruk: Tunngaviusunik inatsisinut piumasaqaat nutaaq
Isuma nutaajunngilaq
2011-mi Inatsisartut upernaakkut ataatsimiinnerani Aqqaluaq B. Egede Siumullu gruppia tunngaviusumik inatsit pillugu isumalioqatigiissitaliortoqarnissaanik siunnersuuteqarput.
Naalakkersuisut taamanikkut innersuussutigaat isumalioqatigiissitaq taanna pillugu nalunaarusiortoqaqqaassasoq Inatsisartut namminiilivinnissap aallartisarnissaa pillugu naggataarutaasumik aalajangiitinnagit.
Nalunaarusiarli qinigaaffimmi 2009-13-imi naammassineqanngilaq, aamma qinigaaffimmi eqqissiveeqisumi 2013-14-imi naammassineqarani. Maannakkulli naammassisariaqarpoq.
Inatsisartut neriorsorai
Naalakkersuisut siulittaasuata Kim Kielsenip Inatsisartut neriorsorpai 2016-imi ukiaanerani ataatsimiinnermi tallimanngornermi septembarip 16-ani aallartittussami kalaallit tunngaviusumik inatsiseqalernissaannut isumalioqatigiissitamut nalunaarusiaq utaqqineqaqisoq saqqummiutissallugu.
– Taamaalilluta tunngavissaqarluarluta aalajangiisinnaavugut Kalaallit Nunaanni tunngaviusumik inatsiseqalernissaq akuerissanerlutigu akuerissannginnerlutiguluunniit, Kim Kielsen oqarpoq.
Atuaruk: D: Aningaasaqarneq tunngaviusumik inatsimmit nutaamit pingaarneruvoq
Allaaserisaq tamaat Sermitsiami saqqummeqqammertumi atuaruk, uani pisiarisinnaavat: