Skip to main content

Kalaallit Nunaata tunineqarnissaanik itigartitsinerup kingorna Trumpip Danmarkimut tikeraarnissani kinguartippaa

Mette Frederiksenip Kalaallit NUnaata tunineqarnissaa itigartitsissutigereeraalu, Trump septembarip 2.-3. Danmarkilianngiinnassaaq.

USA-p præsidentiata, Donald Trumpip, Danmarkimut tikeraarnissani kinguartinniarlugu aalajangerpoq, tamanna septembarip aappaanni pingajuannilu pisussatut pilersaarutaagaluarpoq.

Kalaallit Nunaata USA-mut tunineqarsinnaaneranik periarfissap oqaluuserinissaa ministeriunerup Mette Frederiksenip (S) itigartitsissuteqarnera pissutigalugu tamanna pivoq.

Præsidenti pingasunngornermi unnukkut Twitterimi taama allappoq.

- Danmark nuna immikkuullarissuuvoq innuttaasugissaartoq, kisianni ministeriunerup Mette Frederiksenip Kalaallit Nunaata pisiarineqarnissaanik oqaluuserinninnissamik soqutiginninnginnermik oqaaseqarnera tunuliaqutaralugu, ataatsimiinnissarput sapaatip-akunneri marluk qaangiuppata pisussatut pilersaarutaasoq, piffissamut allamut kinguartinniarpara, Donald Trump allappoq.

Tamatuma kingorna Det Hvide Husip tikeraarnissap taamaatinneqarnera uppernarsaraa, nutaarsiassaqartitsivik Reuters allaaserisaqarpoq.

USA-p Kalaallit Nunaata pisiarinissaanut ”pilersaarusiornikkut soqutiginnittoq” amerikamiut præsidentiata sapaatiummat oqaatigaa – qeqertap Issittumi inissisimanera aamma aatsitassaqarnera ingammik pissutaallutik.

- Tamanna eqqartornikuuarput. Danmarkip tunngaviusumik pigisaraa. Danmark iligaarput, Danmarkilu illersorparput, taamaattumik isumassarsiaq oqaluuserineqarpoq, pilersaarusiornikkullu soqutiginarluinnartoq isumaqarpunga, præsident taama oqarpoq.

Præsidentip aamma Kalaallit Nunaata pisiarineqarsinnaanera ”inissiamik annertoorujussuarmik pisinermut” sanilliuppaa.

Piffissamilu tassani ministeriunerip Mette Frederiksenip Kalaallit Nunaannut tikeraartup, isumassarsiaq itigartilluinnarlugu ”oqallinneq quianaannarnerarpaa”.

- Kalaallit Nunaat tuniniagaanngilaq. Kalaallit Nunaat danskinit pigineqanngilaq. Kalaallit Nunaat kalaallinit pigineqarpoq. Neriuppunga tamanna pimoorussilluni oqaatigineqanngitsoq, ministeriuneq amerikamiut soqutiginninnerat pillugu taama oqarpoq.

Naalakkersuisut siulittaasuata, Kim Kielsenip, Kalaallit Nunaat tuniniagaanngitsoq imaluunniit tuniniagaalernavianngitsoq, sapaatip-akunnerata siuliani oqaatigaa.

Pingasunngornerup unnuaani Trump nangilluni Twitterimi itisiliinermini allappoq, Mette Frederiksen ”aningaasartuuterpassuarnik aamma pisarissersuinerujussuarmik USA-mut Danmarkimullu taama toqqaannartumik oqaaseqarnermini sipaaruteqartitsisoq”

- Tamanna pillugu qutsavigaara, siunissamilu tikeraarnissamut piffissamik nutaamik nassaarnissannut qilanaarpunga, præsident taama allappoq.

Kalaallit Nunaat danskit naalagaaffianut 1800-kkut aallartinnerannili ilannguppoq. Kalaallit Nunaat 1979-imi namminersornerulerpoq, 2009-miillu namminersorluni oqartussaaffeqarnerulerpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER