Kalaallit Nunaata siunissaa suleqatigiissutigissavarput

– Politikeriugutta, atorfiliugutta, NGO-jugutta inuinnaaguttaluunniit Kalaallit Nunaata siunissaa suleqatigiissutigisariaqarparput.
Ilisimatusarfiup pisarnertut tallimanngormat ukiumoortumik naliuttorsiornerani rektor Tine Pars taamatut oqarpoq.
– Inuiaqatigiittut aatsitassarsiulernissap sapinngisamik annertunerpaamik pissarsiffiginissaa sulissutigissavarput. Taamaattumik Ilisimatusarfiup sulissutigaa Aatsitassanut Inuiaqatigiinnullu Centerimik pilersitsinissaq. Taamaasilluta piffiit nutaat naammassiffigisinnaavagut, tamatumani nunatsinni tunngavilimmik nunanilu tamalaani ilisimatusarneq ilinniagaqartitsinerlu inuussutissarsiornerullu ineriartornera ataqatigiissallutik.
– Taamaasiorsinnaanngilagulli universitetit allat suleqatiginngikkutsigik, qujanartumillu Ilisimatusarfik qallunaat, nunat avannarliit nunallu tamalaat universitetiinit suleqatigiittunit suleqatigerusunneqarluarpoq, Tine Pars oqaluttuarpoq.
Atuaruk: "Finn Lynge ataqqinaammik doktorinngortinneqarpoq"
Ukiumoortumik nalliuttorsiornermit asserpassuit takukkit
Nuna tamakkerlugu katersuiniarneq Ikuala nersorneqarpoq
Ataatsimut suliniummi nukiit katinnerisa nukingatut assersuutigineqarpoq nuna tamakkerlugu katersuiniarneq Ikuala. 2013-imi upernaakkut Ilisimatusarfimmi ilinniagaqartut nuna tamakkerlugu ilaqutariinnut kræftimik eqqugaasunut nuna tamakkerlugu katersuiniarneq suliniutigalugulu ingerlappaat. 1 million koruunit sinnerlugit katersorneqarput.
– Iliuuseqarnerup tamassuma takutippaa ilinniartuvut qanoq nukissaqartigalutillu piumassuseqartigisut, aammattaarli takutillugu ataatsimut anguniagaqarnitsigut qanoq angusaqartigisinnaasugut.
– Ulloq taanna isigaara ataqatigiinnerup inoqatinillu pingaartitsinerup ulluatut, Tine pars oqarpoq, Ikuala-meersumillu qaqisitsilluni Ikuala-mik katersuiniartut sinnerlugit universitetip nersualaarinninneranik tigusisussamik.
Qallunaat tuluillu oqaasiisa atornissaat pingaaruteqarpoq
Rektorip sammisaq oqallisigineqartoq, tassa oqaatsit, tikippai. Taanna ilinnagaqartitsinermik isumasioqatigiinnermi peqataaqqammersimavoq, tamatumani oqaatsit oqallisigineqarlutik. Tine Parsip erseqqissarpaa pingaaruteqartoq inuusuttortatta ilinniagaqarnissaminnit mattunneqannginnissaat, qallunaat tuluillu oqaasiinik naammattumik atuisinnaannginnerat pissutigalugu.
– Aaqqiissutissaavoq inuusuttut qallunaat tuluillu oqaasii ilinniassagaat, ilinniagaqalersinnaanissaminnut. Inuusuttortatta utaqqissanngilaat suut nutserneqarnissaat inuiaqatigiinnik silarsuarmillu paasinninnissaminnut, allat nutsigaat apeqqutaatinnagit ilisimasat nutaat paasisinnaassavaat, Tine Pars oqarpoq.
Ilisimatusarfik ukiut tamaasa nalliuttorsiortarpoq, tamatumani ataqqinaammik doktorinngortitsisoqartarluni aamma ph.d.-grad. cand. mag.-itut soraarummeersitsisoqartarluni.
Nittartakkami siusinnerusukkut allaaserineqartutut Finn Lynge tallimanngormat Ilisimatusarfimmi ataqqinaammik doktorinngortinneqarpoq. Nalliuttorsiornermi tassani Inge Høst Seiding soraarummeerumminik "Marries to the Daughters of the Country: Intermarriage and intimacy in Northwest Greenland ca. 1750 to 1850´-imik hd.d-grad-inngortinneqarpoq.
Universitetimi ilinniartut sulisullu sanitigut namminersorlutik oqartussanit aamma Kommuneqarfik Sermersuumit, inuussutissarsiortunit, tigusisartuni allanillu qanimut suleqatigisanit peqataasoqarpoq.