Kalaallit Nunaata Savalimmiormiut pisuut isumassarsiorfigisinnaavai
Savalimmiormiut Europami eqiasuinnerpaajuppaat pisuujunerpaanullu tullersortaallutik. Kalaallit Nunaata Savalimmiut ilinniarfigisariaqaa nunanullu allanut politikkimi nammineq soqutigisaminik aallussinerusariaqarluni – Danmarkimi periaaserineqartumut akerliugaluarpalluunniit – assersuutigalugu aalisakkanik Ruslandimut nioqquteqarnikkut, atorfilittaasimasoq nuimasoq Jakob Janussen isumaqarpoq.
Savalimmiut 1990-ikkut ilungersunartumik kinguariartorsimagaluarlutik ukiuni kingullerni aningaasarsiornikkut ingerlalluarnermik misigisaqarput, Savalimmiormiut nunarsuarmi pisuujunerpaanut ilaalissutigisaannik. Innuttaasumut ataatsimut uuttuinikkut Savalimmiormiut qallunaanit pisuujunerupput.
Aviisi AG taama allappoq.
Taamaalillutik Savalimmiormiut – Kalaallit Nunaannut isumassarsiorfissaqqissumik – takutippaa, nunat ikittunik innuttaqartoq aningaasarsiornikkut aamma siuariarujussuarsinnaasoq.
Savalimmiuni nunami tunisat ataatsimut nalingi (BNP) 1998-imiilli pingasoriaatingajammik qaffassimapput, Innuttaasumut ataatsimut 2019-imi 401.000 koruniupput, Danmarkimi innuttaasumut ataatsimut 398.000 koruuninut sanilliullugit. Kalaallit Nunaanni kisitsit assingusoq tassaavoq 355.000 koruunit.
Savalimmiormiut pisuujuilluinnartut nunat tamalaat akornanni qaffasinnerpaamiipput. Europami taamaallat Luxembourgimit qaangerneqarsimallutik. Tamatuma peqatigisaanik qeqertat 18-iusut Europami suliffissaaleqiffiunnginnerpaajupput, 1,1 procentiinnarmik suliffissaaleqiffiullutik. Savalimmiut Coronap ajornartoortitsineranit nunanit allanit tamangajalluinnarnit aamma akikinnerusumik aniguisimapput.
Savalimmiormiut suliumatuujupput. Europami qaffassinnerpaamik inuussutissarsiornermik 85,4-mik ingerlataqarput. Savalimmiormiunit 15-iniit 74-inut ukiulinni 37.100-nit 31.100-it Savalimmiuni kisitsisitigut naatsorsueqqissaartarfik naapertorlugu inuussutissarsiummik ingerlataqartuupput.
Aviisimi AG-mi atuarnerusinnaavutit, ilaatigut Ruslandimut aalisakkanik tunisisoqartalernissaanik siunnersuut atuarlugu: