Kalaallit Nunaata pingaaruteqassusaanik takutitsisoq
Amerikamiut Kangerlussuarmi akunnerni tallimani tikeraalernerat Kalaallit Nunaata pingaaruteqassusaanik takutitsineruvoq. Anthony Blikenip kalaallit politikeriinik naapitsiniarnera Kalaallit Nunaata qanoq pingaaruteqartigineranik ersersitsisoq, ilisimatooq naliliivoq.
Nunanut allanut Naalakkersuisunngorlaap, Pele Brobergip aamma Naalakkersuisunut siulittaasunngorlaap, Múte B. Egedep nunarsuarmi pissaaneqarnerpaat ilaat nunatsinnut maajip 20-ani tikeraalerpat tikilluaqqusussanngorpaat. Anthony Blinkenip tikeraapallalaarnerani Nunarput USA-lu akunnerminni attaveqatigiinnerat sammineqassaaq.
- Tikeraarneq sukkasuupilussuarmik pisussaagaluartoq Kalaallit Nunaat nunarsuarmi politikernermi qanoq pingaaruteqartiginersoq takutinneqarpoq. Kalaallit politikerii naapinnissaat aamma pingaartinneqarpoq. Tamannalu allarluinnaavoq, Kalaallit Nunaat peqataatinnagu aalajangiisarneq ukiut arlaqanngitsut matuma siorna pisarsimammat, Ilisimatusarfimmi inuiaqatigiilerinermi, aningaasaqarnermi tusagassiutilerinermilu adjunkti, Rasmus Leander Nielsen oqarpoq.
Ilulissanut Nuummulluunniit USA-p nunanut allanut ministeriata tikeraarsinnaagaluarnera ilisimatuup erseqqissaatigaa. Nunatsinni pinngortitaq sermersuullu aakkiartuaarnera taamaalilluni annertunerusumik ilisimasaqarfigilissagaluarai Rasmus Leander Nielsen erseqqissaavoq. Taamaattoq tikeraapallalaarneq Donald Trumpip nunatsinnik pisiariumanninneraniit pitsaanerujussuarmik takutitsivoq.
- Tikeraarneq inussiarnisaarluni tikeraarneruvoq. USA-mi Kalaallit Nunaanni suleqataasussatut pingaarnerpaatut inissikkusuppoq. Ilaatigummi takornarialerinermi, silaannaap allanngoriartornerani piujuaannartitsilluni ineriartortitsisinnaaneq USA-p suleqataaffigerusuppaa. Kalaallit Nunaanni sakkutooqarfeqarneq kisiat USA-p ukkatarerusunngilaa, Rasmus Leander Nielsen oqarpoq.
Naalagaaffimmut piumasaqarneq
USA-p Danmarkip naalagaaffianut ukiuni arlalinni piumasaqartarpoq. Kalaallit Nunaat annertunerusumik pitsaanerusumillu danskit sakkutooqarfianiit nakkutiginnittoqarnissaa noqqaassutigineqartarluni. Kangerlussuarmullu tikeraarneq tamakkununnga tunnganavianngilaq.
- Annertuunik nutaanik isumaqatigiissuteqartoqarnavianngilaq. Danmark, Kalaallit Nunaat USA-lu attaveqarnerat allanngortinneqarnialeraangat immikkut aallartitat suliarisarpaat. Tikeraapallalaarnerup Kalaallit Nunaata nunarsuarmi naalagaaffeqatigiinni assigiinngitsuni pingaaruteqaleraluttuinnartoq takussutissaraa, Rasmus Leander Nielsen naggasiivoq.