Skip to main content

Kalaallit Nunaata naalagaaffeqatigiinnermut ilanngunneqarnera pillugu atuakkiaq nutserneqartariaqarpoq

Atuagaq Imperiets Børn kalaallisuunngorlugu nutserneqartariaqarpoq aamma meeqqat atuarfianni allanilu ilinniartitsinermut atorneqartariaqarluni. Atuakkiortup aamma Naleqqap siulittaasuata Katuami ataasinngornermi oqalliseqatigineqarneranni tamanna oqariartuutigineqarpoq.

Atuakkiortup Anne Kirstine Hermannip oqaluttuarisaanermi paasissutissat atuakkami Imperiets Børn-imi pitsaasumik misissorsimasai nunatta innuttaasuinut kalaallisut atuarneqarsinnaasariaqarput.

Nuummi Katuami atuagaq pillugu ataasinngornermi oqallittoqarnerani tamanna oqariartuutit pingaarnerit ilagaat. Meeqqat atuarfianni ilinniarfinnilu allani, innuttaasut paasitinneqarnerullutik oqallinnissaannik aallartitsiniarluni ilinniartitsinermut ilaatinneqartariaqarpoq, Naleqqami siulittaasoq Pele Broberg oqarpoq.

Aaqqissuussaq Naleqqamit aaqqissorneqarpoq, kisianni oqallittoqarnerani atuakkap imarisaa politikkimut tunnganngitsoq, Pele Brobergip arlaleriarluni naqissuserpaa.

- Atuagaq taamaatsillugu atuarneqarnissaa pingaaruteqarpoq. Oqaluttuarisaanerput aamma 1953-imi Kalaallit Nunaannut naapertuilluanngitsumik pisoqarnera pillugit paasissutissat piviusut. Taanna politikkimik imaqanngilaq.

Atuakkiortoq, tusagassiortoq aamma inuiaqatigiit pillugit ilinniagartooq Anne Kirstine Hermann ukiut tallimat sinnerlugit Naalagaaffeqatigiinnerup oqaluttuarisaaneranik aamma Kalaallit Nunaata danskit naalagaaffianut 1953-imi ilanngunneqarnissaanut pisimasut pillugit misissuivoq. Annikitsuinnaanngitsullu qaqillugit atuakkiamini saqqummiuppai.

FN-imik Kalaallit Nunaannillu pututitsineq

Nunat FN-imut ilaassortat nunasiaateqartut namminersulernissamut aamma politikkikkut kiffaanngissuseqartumik ingerlatsiviulernissaannut taamanikkut isumaqatigiissusiorput.

Kisianni Danmarkimi danskit naalagaaffianut ilaasumik taama annertutigisumik iperaanissamik soqutiginnittoqarsimanngilaq, taamaattumik taarsiullugu Kalaallit Nunaat danskit naalagaaffianut ilanngunneqarpoq. Inuttaasunik taasititseqqaarani imaluunniit aalajangerneq pillugu oqallitsitsinertaqanngitsumik.

FN-ip nunasiaatilinnut namminiilivinnissamut aqqutissiuinissamik piumasaqaataanik avaqqutsiniarluni, atuakkami FN-imit aamma Danmarkimi atuagaateqarfiup toqqorsiviani misissuineq iluaqutsiullugu, Danmarkip assigiinngitsutigut Kalaallit Nunaat qanoq ililluni ilanngutsissimaneraa qulaajarneqarpoq.

Paasissutissanik toqqorterinikkut aamma innuttaasunik peqataatitsinani tamanna pivoq. Inuit nunaqarfinnit pinngitsaalillugit qanoq nuutsinneqartarsimanersut, meeqqat angajoqqaat kissaatiginngisaannik meerarsianngortinneqartarsimanersut, aamma kalaallit oqaasii kulturiallu danskinit taarserneqartoq atuakkami aamma allaatigineqarpoq.

Politikkikkut qisuariarfigineqanngitsoq

Atuakkap imarisaa politikkikkut kinguneqartinneqarsimannginnera atuakkiortumit aamma atuartunit tupigusuutigineqarpoq.

- Atuagaq tusagassiorfinnit ilisimatusartuniillu sammineqarluarpoq. Kisianni naak atuagaq Folketingimi Kalaallit Nunaat pillugu politikkikkut oqaaseqartartunut nassiukkaluariga nipaarluusoqarnera tupaallaatigaara. FN-imit aamma qisuariartoqanngilaq, Anne Kirstine Hermann oqaluttuarpoq.

Ilisimasat atuakkamiittut innuttaasut imminnut paasinnittariaasiannut aamma nunasiaataasimaneq pillugu oqaluttuarisaanerup qanoq isiginissaanut pingaaruteqarput. Taamaattumik kalaallisut siammarterneqassaaq, kalaallit inuiaqatigiit oqallinneranni piviusunik paasitinneqannginnerat pillugu oqaluttuarisaaneq uteqqinneqannginniassammat, aamma Naalagaaffeqatigiinnerup tassanngaanniit qanoq ineriartortinneqaqqinnissaa pillugu, Pele Broberg oqarpoq.

- Danmarkip naalagaaffiup 1953-imi naapertuilluanngitsumik iliuuseqarnera ajornartorsiutaavoq. Danskit ajornartorsiutaanngillat, taanna naqissusiivoq.

Nutserneqarnissaanut aningaasanik pissarsinissaq ajornakusoortoq

Kisianni atuakkap kalaallisut saqqummersinneqarnissaa ajornaatsuinnaanngilaq, atuakkiortoq Anne Kirstine Hermann oqallittoqarnerani oqarpoq.

Atuagaq 2022-mi oqaluttuarisaaneq pillugu atuakkiani atuagatsialattut nersornaaserneqarpoq.

- Kalaallisut nutsertillugu saqqummersinniarsaraara. Kisianni niuerneq tunngavigalugu Kalaallit Nunaanni saqqummersitsiniarneq ajornakusoorluinnarmat, pisisussat amerlanngimmata, taanna oqaluttuarpoq.

Atuakkiortoq aningaasaateqarfinnut aningaasanik qinnuteqarsimagaluarpoq, sulilu ujaasilluni, taanna oqaluttuarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER