Anngunniunneq
Kalaallit Nunaata Cuba ajugaaffigaa
Kalaallit Nunaata assammik arsartartuisa nunanut allanut unammisartuisa angutitaat Pan Amerikamut anngunniunnermi aallartilluarput, unamminermi siullermi Cuba-mut 31-27-mik ajugaapput
Kalaallit assammik arsarluni nunanut allanut unammisartut Pan Amerikami Uruguayimi Montevideomi ingerlanneqartussami peqataanissaat ilimanarsiartorpoq.
Nunanut allanut unammisartut angutit Mexico City-mi unammeqqaarnerminni Cuba 31-27-mik ajugaaffigaat. Muminnermi kalaallit 16-9-mik siuaqqallutik.
Kalaallit Cubamut pingajussaa unammipput aatsaallu ajugaaffigalugit, Assammik arsartartut kattuffiat nalunaarpoq.
Unammineq sakkortooq
'Paasiuminaatsumik unammineq aallartinniarneqarpoq, nalunaaqutaq 14.50 aaqqissuisunit nalunaartoqariasaarpoq nalunaaqutaq 15.00 ammaanersiortoqassasoq, unamminissarpullu nalunaaqutap akunnera affaanik kinguaattoorluni.
Unammineq aallartimmat Cubamiut assut sakkortuumik unammipput. Rasmus Larsen sivisuumik uninngasariaqarsimavoq kiinnamigut akeqqanit eqqortereernermi kingorna, ilimagineqaleraluarlunilu qingaa napisimassasoq. Andreas Lorentzen najungamisumigut aamma ippigusuppoq, Akutaaneq Kreutzmannilu aamma unammisatsinnit sakkortuumik pineqareersoq unamminermi sivisuumik peqataanani. Arsartulli unammeqqinnissamut tamarmik piareeqqapput.
Muminnginnermi Cubamiut sakkortuumik unammipput, mumereernerulli kingorna kalaallit anisitaallattaapput, unamminerlu naajartulernerani ikinnerussuteqarlutik unammillutik.
Qularnaatsumik ajugaasut
Naak arsaq isinngikkaluartoq Cubamiut ataasiarlutik isertitsigaluartut kalaallit unamminermi qularnaatsumik ajugaapput.
Nunanut allanut unammisartunut sungiusaasup Niels Møllerip arsartuni nersorpai.
- Arsartut tamaasa unammilluaqaat, tamarmillu iserlutik. Arsartut sapinngisatik tamaasa atorlugit unamminermut isertarput.
- Paasisinnaanngilarali unammisagut taama sakkortutigisumik unammisinnaammata. Assammik arsartarneq taamatut ineriartussappat unamminerit kusanarnavianngillat. Unamminerli aallartilluaqaarput 2-1-imik siuaratta minutsit tallimat qaangiuttut 6-1-imik siuaratta. Minutsit 15-it ingerlareersut 9-3-mik siuaqqavugut, siuaqqanerpullu unammineq tamaat attallugu, Niels Møller allappoq.' Assammik arsartartut kattuffiat nalunaarpoq.
Puerto Ricomut ullumi unammissapput
Kalaallit Puerto Ricomut ullumi pingasunngornermi unammissapput nalunaaqutaq 18.00 (Kalaallit Nunaat nalunaaqutaq 21.00)