Dronningi 75-nik ukioqalerpoq

Kalaallit Nunaata avammut tunisassiornerannut kunngikkormiut ikiueqataarusuttut

Kalaallit Nunaanni suliffeqarfinnit saaffigineqarnissartik dronning Margrethep kunngikkormiut sinnerlugit kajumissaarutigaa, tunisinissami akigitinneqartussaq naammattumik annertussuseqassappat

Kunngikkormiut Kalaallit Nunaanni 2011-mi tikeraarnerannit assilineqartoq - assi toqqorsivimmit

Ussassaarinermi naleq nalilerneqarsinnaanngitsoq, nunanillu allanit isigalugu ussassaarineq nukittoorujussuaq.

Danmark-imi inuussutissarsiortut nersorinninniartut qalleraatiinnavipput, kunngikkormiut atuutiinnarnissaat pillugu ilaannikkut oqallittoqaleraangat.

Danmarkimi suliffeqarfiit ingerlalluartut ilatigut Grundfos, Mærsk, Toms, IBM Danmark, Raadvad aamma BIG, kunngikkormiut inuuniarneranni ukiumut aningaasaliissutaasartunik 400 millioner koruunit sinneqartunik illersuipput. Aningaasartuutit quleriaatinngorlutik utertinneqartarput suliassiissutit aqqutigalugit, ussassaarinermi kunngikkormiut tusaamasaanertik aqqutigalugu ussassaaruteqarsimappata, imaluunniit tuniniaasarfinni pingaarutilinnik iluaqutissarsisinnaasarlutik, tunisassiatik nillataartitsivimmiittut niaqorummik pinnersaaserneqarsimappata, imalu naqqissuserneqarsimappata, 'By appointment to the royal danish court'.

Naalagaaffeqatigiinnulli akuusut sinneri qanoq ippat?

Kalaallit Nunaanni inuussutissarsiorneq pillugu sunik isumaginnittarnersut kunngikkut 2011-mi Nunatsinnut tikeraarneranni Sermitsiaq.AG-mit aperineqarput.

- Puisit amii prinsilu annertuumik qanoq iliuuseqarfigisarsimavagut. Puisit amiinik atornissarput tulluusimaarutigisarparput, dronning Margrethe oqarpoq.

Puisit amii
Ukiut 20-30-t matuma siorna puisit amii iluarineerummata, puisillu amiinit qaatiguuliat Europami atisaasivinnut sikaavinnut toqqorterneqarmata, nalliuttorsiulaartarnerni inuillu akornanni pisuni puisit amiinik illersuiniartarnini erseqqissaatigaa.

- Puisit amii Kalaallit Nunaanneersut tamatigut erseqqissaatiginiartarsimavagut. Oqartarpugut 'Puisit amii Kalaallit Nunaanneersut atorneqarluarsinnaapput. Kusanartuupput, pitsaasuullutik Kalaallit Nunaanniillu pisuullutik'.

- Puisit amiinik tunisassiorneq maannakkut tateqqinneqalerpoq. Tamanna saniatigut qanoq iliuuseqarfigissaviuk?

- Puisit amiinit qaatiguulianik marlunnik Great Greenland-imit tunineqarnerput assorujussuaq nuannaarutigaarput, uannut prinsimullu. Prins Henriup qaatigoortaani Qaqortumi misilippaa. Naammagilluinnarpaa. Prinsi qaatigooqartoq assilineqarsimasoq taamaattumik takuneqarsinnaavoq. Uanga tunissutisiara iluamik angissuseqanngilaq. Imaanngitsoq atorusunnginnakku, isumaqarlungali suliaq kusanartoq eqqortumik angissusilik atorneqartariaqartoq tamanut takutinneqassaguni, dronning Margrethe oqarpoq.

Nerisassiat pillugit atuakkiaq
Kalaallit Nunaata nunanit allanit pitsaanerpaamik isigineqarnissaa anguniarlugu avammut pitsaanerpaamik kiinnertarlutik prins Henrik oqarpoq.

- Kalaallit Nunaat tamaat tapersersugaraarput, ataasiakkaat pillugit kisimik tapersersuinngilagut. Kalaallit Nunaat sinnerlugu angalasarnerput nuannaarutigisaqaarput, prins Henrik oqarpoq. Kalaallit Nunaanni nerisassiarineqartartut pillugit atuakkiami oqaaseqaateqartareerportaaq.

Atuakkamut KNI suliarinnittuuvoq, atuagarlu juullikkunni saqqummerumaarpoq.

- Inuussutissarsiornikkut ikiueqataarusunnerit oqaatigaat. Taamaattumik siunnerfigineqartut aamma ilissinnut saqqummiunneqartariaqarpat?

- Isuma pitsaasuuvoq, dronning Margrethe oqarpoq.

- Nammineerlutami suliarineqartut ujartorsinnaanngilagut. Inuussutissarsiornikkut attuumassuteqartunit kalaallit suut nittarsaanneqarusunnersut ilisimatitsissutigineqartalersinnaavoq. Tapersersuerusuppugummi, dronning Margrethe oqarpoq.

Dronningip apriilip 16-ani 75-iliineranut atatillugu AG dronning pillugu sammisaqassaaq. Aviisip ilassutaa apriilip 15-ani saqqummissaaq akeqanngitsumillu pdf-ikkut aaneqarsinnaassalluni

Aviisi ataani pisiariuk:

Powered by Labrador CMS