Kalaallit Nunaat Tivolimi: Augustip aallaqqaataasiornissaq taamaatinneqarpoq
Coronap ajornartorsiortitsinerata Københavnimi Tivolimi kalaallit ataatsimoortarnerat aamma eqqorpaa. Ukiuni 40-nit amerlanerusuni pisartoq ukiut tamaasa annertuneruleraluttuinnartoq taamaatiinnarneqarpoq.
Kalaallit inuillu Kalaallit Nunaannut attuumassuteqartut 100-likkuutaat Tivoli Kalaallit Nunaannut tunngasumik juulip 31-ani aamma augustip aallaqqaataani ulloqartitsigaangat katersuuttaraluarput.
Ukioq manna taamaattoqassanngilaq. Coronap ajornartorsiortitsinerata Grønland i Tivoli eqqorpaa. Ukiut tamaasa pisartoq ukioq manna taamaatiinnarneqartariaqarpoq. Tivolimi Kalaallit Nunaannut ulloritinneqartut pillugit aqutsisut, tusagassiutinut taama nalunaaruteqarput.
- Aqutsisunit taamaatitsinerput ajuusaarutigaarput. Oqartussalli ataatsimoortut amerlasuut akornanni maleruaqqusaat malinniarutsigit, aaqqissuussaq naammassisinnaanngilarput, aqutsisut ilisimatitsipput. Aqutsisuni Kim Falck-Petersen siulittaasuuvoq.
Taakku ilanngullugu ilisimatitsipput aappaagumut pisussamut pilersaarusiorneq aallartereersoq.
- Kalaallit Nunaat Tivolimi 2021 pisussanngorpat, coronallu ajornartorsiortitsinera qaangiutereerpat, uterumaarpugut, allapput.
Katersuuttoqassanngilaq
Danskit naalakkersuisuisa aalajangerpaat katersuunnerit anginerusut augustip 31-at ilanngullugu pisussat taamaatinneqassasut.
Ilaqutariit, ikinngutigiit ilisarisimasariillu kalaallit nipilersuutaannik tusarnaarlutillu kalaallit kultooriannik misigisaqassallutik ukiut qulikkuutaat sinnerlugit ussangartarsimapput.
Aqutsisut ilisimatitsipput ukioq manna aaqqissuussaq qaammatini arlalinni pilersaarusiorsimagaluarlugu.
Tivolimi nipilersornermut aliikkusersuinermullu pisortaq, Thor Feilberg taamaatitsineq pillugu nikalluallappoq:
- "Grønland i Tivoli" ukioq manna ingerlanneqarsinnaanngimmat ajuusaartorujussuuvugut. Pisartoq Tivolimi ukiut tamaasa aasaanerani pisartut annerit ilagaat. Oqartussat inassutaat maleruaqqusaallu pilersaarusiornitsinni ilaatillugit eqqarsaatigisariaqarsimavagut, Thor Feilberg oqarpoq.
Imminut illersorsinnaasariaqassaaq
Danmark aamma Kalaallit Nunaat tunillaassortoqarneranit siullermit matoqqareerlutik ammariartoqqileraluarput. Pissutsilli aqutsisunit imaannaanngitsutut nalilerneqarput. Aaqqissuussarlu ukioq manna ingerlanneqassappat imminut illersorsinnaanngitsutut nalilerneqarluni.