Kalaallit Nunaat silarsuarmi kisimiilluni
Tv-qarfiit radioqarfiillu nuna tamakkerlugu aallakaatitsisartut qilersorsimanngitsuunertik uppernassusertillu illersorpaat. Sumiiffippassuarni ussassaarutinut sponsorinullu sakkortuunik malittarisassaqarpoq.
Kalaallit Nunaat, Nunani Avannarlerni kisiartaalerniarpoq tv-kut nutaarsiassanut piffimmilu pisunik aallakaatitassianut toqqaannartumik aningaasaliisoqarnissaanut inatsisitigut akuerisaasoq.
Aviisi AG taama allappoq.
Nunarsuarmi tv-kanalit ataqqineqarnerpaartaanni BBC-mi tamanna akuerineqanngilaq.
- Nutaarsiassat piffissamilu pisunik aallakaatitassiat sponsoreqassanngillat, BBC-p nittartagaani allassimavoq.
Aamma Danmarkimi DR-mi TV2-milu tamanna inerteqqutaavoq.
- Aallakaatitassiat taamaattut sponsorilerneqarnissaat inerteqqutaavoq, DR oqarpoq, taassumalu radiomi fjernsynimilu sponsoreqarneq pillugu nalunaarusiaq innersuussutigaa.
Norskit nuna tamakkerlugu tv-qarfiat radioqarfiallu, NRK, ussassaarutinik aallakaatitsineq ajorpoq, svenskillu nuna tamakkerlugu aallakaatitsiviat STV sponsoreqarnermut aamma sakkortuunik malittarisassaqarpoq.
- Svensk TV aallakaatitsisinnaanermut akuersissut malillugu ukiumut aaqqissuussinerit 20-t sponsoreqartissinnaavai, taakkunannga 19-it timersornermit aaqqissuussinerneersut.
Aviisimi AG-mi atuarnerusinnaavutit. Aviisi uani pissarsiariuk: