Skip to main content

Kalaallit Nunaat semifinalimut anngutinngitsuulaartoq

Unamminerup naammassinissaanut sekundit quliinnanngortut Amerikap nunavittaani pissartanngorniunnermi Argentina semifinalimut annguppoq, Kalaallit Nunaat anngutinngitsoortillugu

Pissanganarpoq! Argentinap aamma Chilep unamminerisa naammassinissaanut minutsit marluinnanngortut 20-20-eqqapput.

Unammisut naligiiginnassappata, Kalaallit Nunaat aamma Chile semifinalimut anngutissagaluarput, Argentinalu ajornikunngotitaassagaluarluni. Naammassinissamut minutsi ataasiinnanngortoq Argentina 21-20-mik siuarpoq.

Tassanngaannarlu Argentina aamma Chile semifinalimiilerput. Argentinami arsartoq anisitaavoq. Sekundit 45-t kiserngoruttut Chile isertitsimmat 21-21-erput. Kalaallit Nunaallu semifinalertussanngortutut inisseqqippoq.

Tamannali sekundinik 30-innarnik sivisussuseqarpoq. Argentina isertitseqqippoq, 22-21. Buenos Airesimi najukkaminni isiginnaartut unammisullu nuannapput. Argentina taamalillutik Amerikap nunavittaani pissartanngorniunnermut annguteqqippoq, Chile aamma taamatut.

Gruppip aappaani Brasilia aamma Uruguay annguteqqipput. Suna tamarmilu pisarnertut iinnarpoq. 

Amerika kujallermi assamik arsarneq
Argentinap Chilellu unamminerat piffissap ilarujussuani kusanartorujussuarmik akiuulluarfiullunilu ingerlanneqarpoq. Naligiiffiusumik aallartinnerup kingorna Argentina siuarujussuarpoq.

15-8 muminnerup inerneraa. 18-12-eqqareerlutik unammineq uummariartorpoq. Chile qanilliartuinnarpoq. Chilermiut Rodrigo Salinasertaat 18-17-ertitsilluni isertitsivoq.

Unamminissap naammassinissaanut minutsit aqqaniliinnanngortut 18-18-erput. Unammisut naligiissappata Kalaallit Nunaat semifinalimut annguttussaavoq. Minutsit kingulliit pissanganarluinnarput, strafferlutik isertitseriarnerit iluatsinngitsut unamminerlu sukkasuumik ingerlavoq. 

Chilep målmandia Felipe Barrientos piffissap ilaani annaasisarnera proccentinngorlugu 87-imiippoq.

Tamannali Kalaallit Nunaannut iluaqutaanngilaq. Argentina ajugaanissap minnerpaaffia atorlugu ajugaavoq: Måli ataasinnguaq, semifinalimullu anngulluni.

Atuaruk: Argentinami tupinnartuliaq

Unammineq akunnittarfimmi isiginnaaraat
Kalaallit unammisartui, sungiusaasui aamma aqutsisui Amerika Kujallermiut unamminerat akunnittarfimminni isiginnaarpaat. Kalaallit Nunaat piffissami semifinalimut annguteqqanerani oqaluttuariuminaakkunarpoq.

Assit takukkit: Kalaallit Nunaata angusaasa annersaat

Isertitsinerpaatut rekortimik angusineq
Kalaallit Nunaata Chilemut unamminerani Minik Dahl Høeghip 16-eraarluni isertitsinerpaatut rekortia Lars Møllerip anguaa.

Guatemalamut unamminermi kalaallit isertitsisut

  • Lars Møller 16
  • Inuujuk O. Søholm 8
  • Nuuno Lars Olsen 5
  • Aqqalu Ingemann 4
  • Karl F. Frederiksen 4
  • Miki Duko Sørensen 3
  • Muusa O. Søholm 2
  • Akutaaneq Kreutzmann 1
  • Milan Olsen 1

Arfininngorpat unammeqqissasut
Kalaallit Nunaata arfininngorpat USA ajugaasut tallimaattut, arfernattut aamma arfineq-aappaattut pingajuattullu inissinniunnermi unammissavaa. Kalaallit Nunaat tallimaattut inississaguni tassani ajugaasariaqarpoq, Puerto Ricop aamma Mexicop unammineraannilu ajugaasut sapaatiuppat ajugaaffigisariaqassallugit.

Video nuannerluinnartoq takuuk: Unammisartut ajugaanertik imatut malunnartittarpaat

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER