isumaqatigiissut
Kalaallit Nunaat sakkutooqarfimmut pitsaanerusumik isumaqatigiissuteqarnissamut piumasaqarpoq
Pituffiup Kalaallit Nunaannut annertunerusumik pissarsiaqaatigineqartarnissaanut politikkikkut annertuumik tapersersorneqarpoq
Pituffik nunarsuarmi qeqertat annerpaartaanniitinneqarnerani inuiaqatigiit ataavartumik tigussaasumik pitsaaqutinik qulakkeerinniffigineqarsimannginnerat Kalaallit Nunaannit akuersaarneqarsinnaanngilaq.
Inatsisartut Nunanut Allanut Sillimaniarnermullu Ataatsimiititaliaat aamma Nunanut Allanut Naalakkersuisoq, Vittus Qujaukitsoq, USA-mut tikeraarnermut atatillugu ataatsimut oqaaseqarnerminni taama naqissusiipput.
Atuaruk: Pituffimmut aalajangiineq ingerlateqqinneqartoq
Isumaqatigiissut annaaneqartoq
Amerikamiut ingerlatseqatigiiffiat Exelis Servicesip Pituffimmi kiffartuussinissamut isumaqatigiissut, ilaatigut Namminersorlutik Oqartussanit pigineqartumit Greenland Contractorsimit tigussagaa paasinarsimmat taamatut oqariartortoqarpoq.
Taamatullu Amerikamiut Nunatsinni sakkutooqarfigisimasaanni arlalinni mingutsitsisoqaratarsinnaanera nutaamik ukkatarineqalermat.
Qajannarpallaartoq
- Thule Air Basemi kiffartuussinissamut isumaqatigiissuteqartarnerit ersersippaat taamatut aaqqissuussisimaneq qajannarpallaartoq inuiaqatigiinnullu kalaallinut ataatsimut isigalugu killilerujussuarmik iluaqutissiisartoq, oqaaseqarnermi tamanna atuarneqarsinnaavoq.
- Taamaattumik Naalakkersuisut ilungersorlutik ataavartumik aaqqiiniarlutik USA peqatigalugu aaqqiissuteqarniarnerat ataatsimiititaliamit tamakkiisumik tapersersorneqarpoq, tassuunakkut USA-p Kalaallit Nunaanni qaqugukkulluunniit sakkutooqarfeqarnera inuiaqatigiinnut kalaallinut annertunerpaamik iluaqutissarsiffigineqarniassammat.
Tassunga tunngatillugu politikerit tikkuarpaat, illersornissamut isumaqatigiissutip USA-mut isumaqatiginninniutigineqaqqinnissaa piumasaqaataalersinnaasoq.