Kalaallit Nunaat Pompeomik ataatsimeeqateqarnermi oqaluuserisassat pingaarnerit ilagivaat

Nunanut allanut ministerip Jeppe Kofodip uppernarsarpaa, Amerikami nunanut allanut ministerimik ataatsimeeqateqaqqaarnermini Ane Lone Bagger peqataaniartoq

Nunanut allanut ministeri Jeppe Kofod (Soc) aamma Nunanut Allanut Naalakkersusoq Ane Lone Bagger (S) Amerikami nunanut allanut ministerimik Mike Pompeomik ullumi ataatsimeeqateqassapput. Tamanna maanna pisortatigoortumik uppernarsarneqarpoq.

Ane Lone Baggerip peqataatinneqarneranut pissutaavoq, Kalaallit Nunaata Issittullu oqaluuserisassanut ilaanerat.

- Kalaallit Nunaat peqatigalugu Issittumi Kalaallillu Nunaanni ineriartorneq pillugu Amerikamiut tigussaasumik oqaloqatigeqqissavavut, Jeppe Kofod tusagassiorfinnut nalunaaruteqarnermini oqarpoq.

- Sumiiffimmut tunngatillugu politikkikkut soqutiginnikkiartuinnartoqarnera ilutigalugu Amerikap sumiiffimmik ukkatarinnikkaluttuinnarnera akulerukkaluttuinnarneralu aamma takusinnaavarput .

- Tamanna pillugu Kalaallit Nunaanni nunanut allanut naalakkersuisoqartiga attaveqarfigilluartarpara – nunanut allanut sillimaniarnermullu tunngasutigut, pingaartumik Kalaallit Nunaannut immikkut tunngassutilinnik suleqatigiinnitta ineriartortinneqarnissaa pingaartilluinnarpara. Amerikamiut soqutiginninnerat tikilluaqqusimavarput, peqatigiillutalu Pompeomik oqaloqateqarnissarput qilanaaralugu. Qitiutillugu nalunaarutissarput tassaavoq, Amerikamiut soqutiginnikkaluttuinnarnerat Kalaallit Nunaannut iluaqutitaqartariaqartoq.

Sammisassalli oqimaatsut, soorlu Syrien aamma NATO oqaluuserisassanut aamma ilaapput.

- USA Danmarkip nunanut allanut sillimaniarnermullu tunngasutigut qaninnertut suleqatigaa. Pingaaruteqarpoq, USA-p nunani tamalaani suleqatititut tunniussimanerata attatiinnarneqarnissaa – aamma ilaatigut Syrienimi Afghanistanimilu ataatsimoorluta unammilligassarpassuavut isumaginiarutisit suleqatigiinnitta nukittorsarneqarnissaa, Jeppe Kofod oqarpoq.

Ane Lone Bagger Kalaallit Nunaannut Issittumullu tunngatillugit taamaallaat peqataassaaq. Jeppe Kofod nunanut allanut ministeritut aatsaat siullermeerluni Washingtonimiippoq.

Powered by Labrador CMS