Kalaallit Nunaat pillugu filmitoqqat internetsikkut isiginnaarneqarsinnaasut
Det Danske Filminstitut filmitoqqanik Kalaallit Nunaanneersunik digitaliseeriileruttorpoq. Filmit internetsikkut akeqanngitsumik isiginnaarneqarsinnaapput.
1921-mi filimiliaq nipeqangitsoq, 'En rejse til Grønland', kalaallillu arnartaasa Sisimiut aalisakkeriviani sulisarnerminnik oqaluttuarnerat pillugu filmiliaq 'Arbejderkvinder i Grønland' 1975-imeersoq isiginnaarneqarsinnaasut ilagaat.
Filmit siuliani pineqartut kiisalu Kalaallit Nunaanni filmiliatoqqat allat 186-it filmcentralen.dk aqqutigalugu akeqanngitsumik isiginnaarneqarsinnaapput.
Det Danske Filminstitut filmiliatoqqanik digitaliseeriisuuvoq. Filminstituti digitaliseeriinissamut 2019-imi Kulturministeeriaqarfimmi 2,3 millioner koruuningajalluinnarnik aningaasaliiffigineqarsimavoq, en million koruunit Kalaallit Nunaanni filmiliatoqqanut atugassanngortinneqarsimallutik.
Filminstututi aamma immikkut sammisaqarsimavoq, tassalu kunngikkormiut Kalaallit Nunaannut angalanerat.
Kunngikkormiut ukiut 100-t matuma siornatigut siullermeerlutik Kalaallit Nunaannukarsimanerat tassni sammineqarsimalluni.
Filmi 'Kong Christian den tiende i Grønland' minutsinik tallimangajannik sivisussuseqartoq una toorlugu isiginnaarneqarsinnaavoq