Kalaallit Nunaat piffissami nutaajunerusumi

Mittarfissat Kalaallit Nunaanni aqqusersuutitigut kivitsissapput, nunarsuarmiut Kalaallit Nunaannik Kalaallit Nunaatalu nunarsuarmut eqqumaffiginninnerannut pingaaruteqartumik, ministeriunerusimasoq Lars Løkke Rasmussen, Future Greenlandimut sapaatip-akunnerata tulliani peqataasussaq, oqarpoq.

Ministeriunerusimasoq Lars Løkke Rasmussen kingullermik Kalaallit Nunaannut 2018-imi tikeraarpoq, taamani Naalakkersuisut siulittaasorimasaat Kim Kielsen peqatigalugu mittarfiliortiternissamik isumaqatigiissut atsioriartoramiuk.

Danmarkimi ministeriunerusimasoq Lars Løkke Rasmussen ataatsimeersuarnermi Future Greenlandimi, sapaatip-akunnerata tulliani Katuami ingerlanneqartussami, oqalugiartussat akornanniippoq. Nunanut allanut ministeriusimasoq Martin Lidegaard, Radikale Venstreneersoq, aamma IA sinnerlugu Folketingimut ilaasortaq Aaja Chemnitz Larsen, peqatigalugit Kalaallit Nunaat 2050-imi pillugu oqallitsitsinermut peqataassaaq.

Aviisi Sermitsiaq taama allappoq.

- Kalaallit Nunaannut tikeqqinnissara qilanaarisorujussuuara. Kingullermik Kalaallit Nunaanniikkama mittarfiliortiternissamik isumaqatigiissut Kim Kielsen peqatigalugu 2018-imi atsiorpara. Taamaattumik uggorilaagatuara tassaavoq ulluni sisamaannarni Nuummiittussaanera. Taavani piffissaq sivisunerusoq atorusussinnaagaluarpara, Lars Løkke Rasmussen, ataasinngornermi Nuummukartussaq sisamanngornermilu Danmarkimut utertussaq, oqarpoq.

Nunap immikkoortuinut siammaaneq

- Kalaallit Nunaat ukiuni makkunani sumut ingerlava?

- Kalaallit Nunaat sinnerlugu isumalluangaatsiarpunga. Attaveqaasersuutinik kivitsinerup, mittarfiit nutaat aqqutigalugit pisussap, pingaarutaa ingasaallugu nalilerneqarsinnaanngitsoq isumaqarpunga. Tamanna nunarsuup sinneranut qanissutsimik allaanerulluinnartumik pilersitsissaaq annertuumik pingaarutilimmik, nunarsuup Kalaallit Nunaannik eqqumaffiginninneranut aamma Kalaallit Nunaata nunarsuarmut eqqumaffiginninneranik imaqartumik. Tamatuma saniatigut takornariaqarnermi niuernermilu periarfissanik kiisalu aatsitassarsiornermut tunngasunik.

Aviisimi Sermitsiami atuarnerusinnaavutit. Aviisi uani pissarsiariuk:

Powered by Labrador CMS