Kalaallit Nunaat oqaluttuarisaanermut ilaavoq

Springeren - Aalborgimi imarsiornermut tunngasunut misigisassarsiortitsivik, Kalaallit Nunaannit oqaluttuanik ujartuivoq, Aalborgimmi Talittarfissua pillugu oqaluttuaq allanneqangajalerpoq. Katersugaasiviup pilersaarutaasa ilagaat kalaallit imartaani angallannermut misiliutitut ilanngunnissaq.

- Aalborgimi talittarfik ukiuni 50-ini kingullerni Kalaallit Nunaannut assartuinermi qitiulluinnarsimavoq – siunissarluunniit qanoq isikkoqassagaluarpat talittarfiup oqaluttuarisaanerani Kalaallit Nunaannut assartuineq inissaqartuassaaq.

Andreas Hansen, Springerenimi, tassa Aalborgimi imarsiornermut tunngasunut misigisassarsiortitsivimmi, oqaluttuarisaanermik suliaqartoq oqarpoq.

Aalborgimi talittarfiup oqaluttuarisaanera pillugu digitalikkut nutarsaanissamik misigisassarsiortitsivik suliakkerneqarsimavoq. Taamaammat Andreas Hansen Kalaallit Nunaannut assartuisarnermik ilisimasallit tamaasa attavigerusuppai – pingaartumik oqaluttuassallit assiutillillu.

Imarsiornermit oqaluttuat

- Soorlu imarsiortuusinnaapput, Danmarkip Kalaallit Nunaatalu akornanni imarsiortuusimasut, misigisimasaminnik oqaluttuarsinnaasut. Aammali assartuinerup Kalaallit Nunaannut qanoq isumaqarsimaneranik oqaluttuassallit aammali oqaluttuaasinnaapput Grønlandshavnip 1972-imi Aalborgimut nuunneqarnerata kingunerannik oqaluttuarsinnaasut. Immaqa KGH-mi sulisimasut arlaata eqqaamavaa, Andreas Hansen oqarpoq.

Oqaluttuarisaanermik suliaqartup oqaluttuat assillu soqutigai, taakkumi Aalborgimi talittarfiup oqaluttuarisaanerata digitalinngorsarnissaanut ilassutaasinnaammata. Aammali Kalaallit Nunaannut assartuinermi atortuusimasunik soqutiginnippoq.

Springeren Kalaallit Nunaannut assartuisarneq pillugu saqqummersitaateqareerpoq, soorlu qajaq aamma assit qangarnisat.

Kalaallit imarsiornerannut tunngasumik saqqummersitsisoqangajalerpoq

- Kalaallit Nunaata imartaani angallannermit saqqummersitsinerput annertusissallugu pilersaaruteqarpugut, taamaammat arlaat taakkunannga pigisaqarpat, imaluunniit assartuisarnermit oqaluttuassaqarpat – soorlu angallatit pillugit allalluunniit, taava oqaloqatigerusuppagut, pigisaaluunniit atorusuppagut pissarsiaralugilluunniit.

Springeren 1992-imi ammarpoq, ateqaataa katersugaasivimmi takornagassani pingaarnerpaavoq. Tassa imaani aqqartartoq 53 miiterisut takitigisoq Springerenimik ateqartoq. Aqqartartoq iserfigineqarsinnaavoq, katersugaasiviullu silataaniitinneqarluni.

Springerenimi aamma takuneqarsinnaavoq Kalaallit Nunaanneersoq Aloutte qulimiguulik, 1962-imiit 1982-imut imaani nakkutilliinerni atorneqartarsimasoq.

Springeren imarsiornermut katersugaasivittut aallartippoq, Kalaallit Nunaannilu imarsiornermut tunngasunut saqqummersitaqarluni. Pilersaarutigineqarpoq saqqummersitsineq ukiuni tullerni annertusarneqassasoq.

Powered by Labrador CMS