Kalaallit Nunaat nutaamik biskoppertaarpoq
Paneeraq Siegstad Munk Nuummi Hans Egedep Oqaluffiani sapaammi biskoppitut ivertinneqarpoq. Dronning Margrethe biskoppinngortitsinermut najuuppoq.
Nuummi sapaatiummat oqaluffimmi ilagiinni annertuumik pisoqarpoq. Kalaallit Nunaat nutaamik biskoppertaarpoq, Paneeraq Siegstad Munk biskoppimut ivertinneqarmat.
Biskoppimut ivertitsisoqarpoq, ivertitsinissaq coronamut killilersuutit pissutigalugit arlaleriarluni kinguartinneqatareersoq. Siullermik 2020-mi novembarip 22-ani biskoppimut ivertitsisoqartussaagaluarpoq, tamannali 2021-mi aggustip aallaqqaataanut kinguartinneqarsimarialuni kinguarteqqinneqarsimavoq.
Sapaammi oqaluffimmi Paneeraq Siegstad Munk biskoppimut ivertinneqarmat Dronning Margrethe ulluni tallimani Kalaallit Nunaannut tikeraartoq malinnaavoq.
Dronningip saniatigut biskoppit arlallit aamma peqataapput. Taakku tassaallutik Lolland-Falsterip Biskoppeqarfiani biskoppi Marianne Garden, Savalimmiut Biskoppeqarfiani biskoppi Jogvan Fridriksson kiisalu Viborgip Biskoppeqarfiani biskoppi Henrik Stubkjær aamma Islandimi biskoppi Kristjan Bjornsson.
Paneeraq attortissimasoq
Kalaallit Nunaata Biskoppeqarfiani maannamut biskoppiusoq Sofie Petersen, Paneeraq Sigestad Munkimik attortissimarpaloqisumik biskoppinngortitsivoq.
Sofie Petersenip Hans Egedep Kalaallit Nunaannut tikinneranit ukiut 300-nngornerat aamma oqaluffimmi kalaallisut oqaatsitta atorneqartarnissaasa pingaaruteqarnerat oqaaseqarfigai.
Sofiap aamma eqqaasississutigaa, nunaqarfinni illoqarfinnilu mikinerusuni ilagiit biskoppimit pulaarneqartarnissartik kissaatigisaraat. Naapeqatigiittarneq ilagiinnut iluaqutaasarpoq, biskoppinngortorlu ilagiit ataatsimoortinniarlugit suliaqarnermini nukissaqarluarnissaanik kissaappaa. Aaamma avinngarussimasuniittunik ataatsimoortitsinissaa eqqarsaatigalugu.
Paneeraq Siegstad Munk oqaaseqarnermini ilaatigut dronningi biskoppinngortitsinermut peqataanera pillugu qujassuteqarpoq. Najuunnera Kalaallillu Nunaanni tarnikkut inuuneqarnermut soqutiginninnera innuttaasunut pingaaruteqartoq, biskoppinngorlaap oqaatigaa.
Paneeraq Siegstad Munk 2020-mi oktobarip qaammataani biskoppinngorniat sisamaasut akornanni biskoppissatut nutaatut qinigaavoq, taasisinnaasullu affaat sinnerlugit taaguunneqarsimalluni.