Kalaallit Nunaat Nunavullu peqatigiinnissamik isumaqatigiissuteqartut
Naalakkersisut Nunavummilu naalakkersuisut peqatigiinnissamik isumaqatigiissut, susassaqarfinni arlalinni suleqatigiiffiunerulersussaq atsiorpaat.
Kalaallit Nunaata Nunavullu suleqatigiinnerat nukittorsarneqassaaq aamma kultureqarnerup, ilinniartitaanerup, aalisarnerup, mingutsitsinngitsumik nukissiuuteqarnerup iluini nunallu taakkua marluusut akornanni angalanerunissaq pillugit suleqatigiinneq annertunerulersineqassaaq.
Naalakkersuisut Nunavummilu naalakkersuisut taamatut isumaqatigiissuteqarput.
Naalakkersuisut Siulittaasuata Múte B. Egedep Nunavumilu naalakkersuisut siulittaasuata P. J. Akeeagok-ip Paaseqatigiinnissamik isumaqatigiissut atsiorpaat. Namminersorlutik Oqartussanit tusagassiorfitsigut nalunaaruteqarnermi ilimatitsissutigineqarpoq.
- Nunarsuarmi tamarmi nunarsuarmioqatigiiffiusumi inuuvugut ukkassinerlu Inunnut Issittumullu sammisinneqarpoq. Ataatsimoorfeqartorujussuuvugut Nunavullu pitsaasumik tatiginnittumillu ikinngutigereerparput. Isumaqatigiissutip matuma suli immitsinnut qaninnerulersissavaatigut, Naalakkersuisut Siulittaasuat Múte Bourup Egede tusagassiorfitsigut nalunaaruteqarnermi oqarpoq.
Isumaqatigiissutip imarai nunat taakku marluk akornanni ilisimasanik avitseqatigiittarnissaq aamma assersuutigalugu mingutsitsinngitsumik nukissiuuteqarnerup iluani misilittakkanik avitseqatigiittarnissaq.
Isumaqatigiissut atuarsinnaavat UANI.