Kalaallit Nunaat EU-mit pineqaatissinneqassanngilaq
EU-Parlamentip aalisarnermut ataatsimiititaliaata siulittaasua, Chris Davies, oqarpoq, Atlantikup Avannaani avaleraasartuulerngusaannerit unitsinneqarnissaat neriuutigigini. EU-p Kalaallit Nunaannut ukioq manna avaleraasartortassanik qaffaasimaneq pissutigalugu pineqaatissiinissaanut aarlerinat qaangiukkallarpoq.
EU-Kommissionip sakkortuumik alloriarluni Kalaallit Nunaannut Islandimullu nunani taakkunani marlunni naalakkersuisut avaleraasartoortassanik 2019-imi qaffaasimanerat pissutigalugu pineqaatissiisinnaaneranut aarlerinaat qaangiukkallarpoq, Sermitsiaq allappoq.
EU-Parlamentip aalisarnermut ataatsimiititaliaani Bruxellesimi qaammammi matumani siusinnerusukkut ataatsimiinnermut peqataasut ilaat arlallit taama inerniliipput. Taakkua ilagaat ataatsimiititaliap siullittaasuata tullia qallunaaq, Søren Gade, Venstreneersoq.
- Ataatsimiinnermi EU-p pineqaatissiinissaanik sioorasaarutinik saqqummiussisoqanngilaq. Siulittaasup Chris Daviesip Kalaallit Nunaat Islandilu kajumissaarpai EU-p, Norgep Savalimmiullu avaleraasartuut pillugit isumaqatigiissutaannut ilanngunniaqqullugit. Isumaqarpunga ataatsimiinnermi nipi ajunngilluinnartoq, Søren Gade oqarpoq.
Taava EU-p Kalaallit Nunaannut Islandimut pineqaatissiissuteqarsinnaaneranut aarlerinaat qaangiussimagunarpa?
- Aap, taama isumaqarpunga. Aalisarnermut ataatsimiititaliamut ilaasortat sinnerinit siulittaasoq akerlilerneqanngilaq, taassumalu EU-Kommissioni ersarissumik kaammattorpaa, nunat taakkua marluk avaleraasartuut pillugit isumaqatigiissummut ilanngutitinniaqqullugit. Kajumissaarullu taanna kommissionip malissanerlugu malissannginnerluguluunniit qinersinnaavaa, oqarpoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: