Kalaallit Nunaat Danmarkimit suliassaqarfimmik tigusivoq

Ingerlatseqatigiiffinnut-, Naatsorsuuserisarnermut - Kukkunersiuisarnermullu tunngasut suliassaqarfimmik Danmarkimit nunatsinnut oqartussaavigilernissaa Naalakkersuisut maanna isumaqatiginninniarnissamut aallartisaalerput.

Ukiut qulit ingerlanerini aatsaavissuaq suliassaqarfimmik Danmarkimit Namminersorlutik Oqartussat tigusilerput. Naalakkersuisut aalajangernerat statsministerimut una sapaatip akunnerata ingerlanerani ilisimatitsissutigaat.

Inuussutissarsiornermut Niuernermullu Naalakkersuisup, Pele Brobergip Naalagaaffimmi oqartussat isumaqatiginninniarfigisussanngorpai. Ingerlatseqatigiiffinnut-, Naatsorsuuserisarnermut - Kukkunersiuisarnermullu tunngasut Danmarkimit nunatsinnut oqartussaavigilernissaa isumaqatiginninniaassutigineqassapput.

- Avammut nalunaarut nuannerpoq. Tamannami piffissami sivisuumi sulissutigisimavarput, suliattalu ingerlarsornerat qulakkeerusuppagut. Naalakkersuisut tamarmik isumaqatigiillutik aalajangernerat aamma nuannaarutigaara, Pele Broberg Sermitsiaq.AG-imut oqarpoq.

- Tulluusimaarutigaara sulisoqaratta periarfissanik takunnissinnaasunik naalakkersuisooqatigiinnissamillu isumaqatigiissut qanoq ingerlanneqarsinnaanersoq qanorlu iliorsinnaanersugut sulissutigisarpaat, taanna oqarpoq.

Múte statsministerimut suliaq pillugu ilisimatitsivoq

Suliassaqarfiup tigunerani Naalakkersuisut inatsisinik Kalaallit Nunaanut tulluartunik pilersitsisinnaalissaaq.

- Imaaliallaanagassaanngilaq. Maanna Danmarkimi piginneqatigiiffiit pillugit inatsiseqangaatsiarpugut, kisianni Danmark EU-mut ilaasortaavoq uagullu ilaasortaanngilagut. Piginneqatigiiffiit pillugit inatsisissatsinni nammineerluta nioqqutissanik eqqussineq avammullu tunisineq inatsisiliarisussaavagut, soorunami aamma Nunatsinni suliffeqarfiit inatsisissaanik suliaqartussaavugut, Broberg naqissusiivoq.

Taamatut aalajangiussineq Naalakkersuisut Siulittaasuata novembarip 19-anni 2021 Statsministerimut Mette Frederiksenimut ilisimatitsissutigaa. Tassunga atatillugu Inuussutissarsiornermut Niuernermullu Naalakkersuisoq inatsimmik tassunga attuumassutilimmik suliaqarnissamik suliassaqarfiullu tigunissaanut ulluliussassamik suliaqassaaq.

Suliassaqarfik "akikitsoq"

Suliassaqarfimmik kingullermik tigusaqarneq ukioq 2010 pivoq. Suliassaqarfiit tiguneqartut tassaallutik Aatsitassaqarnermut aammalu imartani Sulinermi avatangiisinut suliassaqarfik.

Qaqugulu suliassaqarfiup tullia tiguneqarsinnaanera suli ilisimaneqanngilaq.

- Suut tamaasa ajunngitsumik ingerlappata taava ukiup tulliani naatsorsuutigaarput. Inatsisartut soorunami suliap ingerlanerani aamma tigunerani suleqatigineqassapput, Peke Broberg oqarpoq.

Suliassaqarfiup tiguneratigut suliassaqarfiup digitaliserernissaanut suliaqartoqassaaq. Digitaliseriinikkut Kalaallit Nunaanni ingerlatsinermi suliffeqarfiit inuussutissarsiornikkullu pitsaanerusumik ataatsimut isiginnissinnaalernissaq iluaquserneqassapput.

Suliassaqarfimmik tigusiniarnerup qanoq akisutigissanera qanorlu annertussuseqassanera Pele Brobergip maanna oqaatigisinnaanngikkallarpaa. Kisiannilu suliassaqarfik akikitsut ilaanniippoq, suliassaqarfillu inuussutissaqarfimmit akikinnerungaatsiartoq, taanna paasissutissiivoq.

Naalakkersuisooqatigiinnissamik isumaqatigiissummi inuussutissaqarfik akisussaaffigilernissaa isumaqatigiissutaavoq, Kalaallit Nunaatalu akisussaaffigilissaguniuk ukiumut 25-30 millionit koruuninik naleqarnissaa naatsorsorneqarnikuuvoq.

Powered by Labrador CMS