Kalaallit Nunaat covid-19-imik misileraatissanik 5.000-inik pisivoq

Amerikamiut Nunanut allanut ministeriaqarfiat aamma Københavnimi Amerikamiut Aallartitaqarfiat ikiortigalugit pisisoqartoq, Namminersorlutik Oqartussat tusagassiutinut nalunaaruteqarlutik ilisimatitsipput.

- Kalaallit Nunaanni covid-19-imut misileraatissat 5000-it qanittukkut pigilissagivut nutaarsiassaavoq nuannersoq. Misileraatit nutaat iluaqutigalugit sukkanerusumik ajornannginnerusumillu misiliisarsinnaalissaagut, nunatta nakorsaanera Henrik L. Hansen tusagassiutinut nalunaarummi oqarpoq.

Atoruminarnerupput

Nuummi qaammat kingulleq nutaamik qitiusumik misileraaviliortoqarpoq, misiliutit Danmarkimut nassiuteqqaanngikkaluarlugit nunatsinni misissorneqarsinnaaniassammata.

Namminersorlutik Oqartussat ilisimatitsipput qitiusumik misileraaveqarneq qaammat sinnerlugu ingerlasussatut pilersaarutaasimanngitsoq, akisummat. Qitiusumik misileraaviup ingerlanissaanut nunanit allaneersut immikkut ilisimasallit atorneqartariaqarnerat akisoqutaavoq.

Misileraatit nutaat 5.000-it peqqinnissaqarfimmi sulisunit atorneqarsinnaapput, sukkanerusumillu akissutisisoqarsinnaalluni.

Tuberkulosemut misileraatit atorneqarsinnaapput

- Misileraatit nutaat immikkut atoruminartuupput, tassami misileraatini Nuummi pigileriikkatsinni misissuiffigeqqissaarneqarsinnaagamik, taanna pingaarnertut tuberkulosertunik misissuinerni atorneqartaraluarpoq. Tamatuma saniatigut misissueriaaseq maannakkut atukkatsinnit pisariunnginneraaq aamma nal. ak. ataasiinnaq qaangiukkaangat misiligutinit akissutisisoqarsinnaalerpoq, Henrik L. Hansen oqarpoq.

Novo Nordisk Fonden Kalaallit Nunaanni covid-19-imik misileraanissanut atugassanik 2,8 milliuunit koruuninik tunniussaqarsimavoq, tassalu aningaasaliissutinit taakkunannga misileraatissat 5.000-it akilerneqarnissaannut tunniunneqarsimapput. Misileraatissat ilaasa siulliit Nuummut apuuttareerput atulerneqareerlutillu.

Kalaallit Nunaanni inuit manna tikillugu 1.520-it covid-19-imut misissortissimapput.