Kalaallit Nunaat coronavirusimik tunillatsissimasueruteqqippoq
Ilisimatusartut umiarsuaanni Nanortalimmut tikissimasumi inuttaq coronavirusimik tunillatsissimasoq peqqisseqqissimavoq, taamalu coronavirusimik ersigineqaqisumik Kalaallit Nunaanni tunillatsissimasuerulluni.
Nunatsinni Nakorsaaneqarfiup nittartagaani atuarneqarsinnaavoq, inuit 14-it tunillatsissimasut maanna tamarmik peqqisseqqissimalersut.
Aamma nittartakkami takuneqarsinnaavoq, coronamut misissortissimasut 6.000-inngornissaannut inuk ataaseq kisimi amigaataalersimasoq, tassa Kalaallit Nunaanni innuttaasut 10 procentii sinnerlugit misissortissimapput.
Ernumatitsisimasoq
Ilisimatusartut umiarsuaanni inuttaq nunamit allameersoq coronamik tunillatsissimasoq juulip 23-ani paasineqarmat ernumasoqalersimavoq. Tunillatsittoqarsimavormi tikinnermit ullut tallimat qaangiunneranni misissuisoqartarnerata nalaani.
Umiarsuarmi inuttat allat tunillatsissimanngillat, tunillatsissimasorli suli mattussimatinneqalinngitsoq inuttat Nanortalimmi angalaartarsimammata tuniluuttoqalersinnaanera ernummatigineqalersimavoq. Tunillatsissimasup mattussimasussaanermut malittarisassanik malinnissimannginnera pissutigalugu politiit pisumik misissuisimapput.
Sumiiffimmi allanik tunillatsittoqarsimanngimmat, coronavirusi tuniluutilersimanngitsoq ilimagineqarpoq.