Kalaallit Nunaat aviisimik ataatsimik piitsuunerulerpoq

Kujataani aviisi akeqanngitsoq, Tamanut Kujataani, ukiut marluk sinnilaarlugit saqqummersinneqartarpoq, taanna tusagassiorfimmit Sermitsiaq.AG-mit maannamut ingerlanneqarsimagaluarpoq.

Aviisip mikisup matuneqarnissaanut aalajangerneq ajornarsimanngilaq, pisortaq Poul Krarup oqarpoq.

- Ajuusaarutigeqaara Tamanut Kujataani matusariaqaratsigu, isumaqarattami Kujataani pisorpassuit saqqummiunneqarneq ajortut.

Aviiseerunnissaa ernumassutigigaa
- Najukkami aviisimik ajornartorsiutinik qulaarsinissamik peqataasussamik pilersitsiniarsimavugut, ajoraluartumilli tamanna aningaasatigut tunngavissaqanngitsoq paasinarsivoq, taanna oqarpoq.

Tusagassiuutinut tapiissutinik amigaateqarneq pissutigalugu, tusagassiorfiup Kujataani aviisi aamma Avannaani aviisi, Tamanut Avannaani, matusariaqarnissaat ernumassutigineqartoq, decembarip pingajuanni tamanut saqqummiunneqarpoq.

Atuaruk: Aviisit marluk tapiissutinik kukkunermit eqqugaasinnaapput

Kujataani aviisimik akeqanngitsumik aallartitseqqinnissaq, pisortap Krarupip takorloorsinnaavaa.

- Piffissami kingusinnerusukkut aviisimik saqqummersitsisalernissamik periarfissaqalernissaa neriuutigisinnaavarput, taanna oqarpoq.

Ussassaarutinik napasoq
- Aviisi akeqanngitsoq ussassaarutinik isertitanik taamaallaat napatinneqarsinnaavoq, ajoraluartumilli niuerfimmik ingerlatsisunit imaluunniit suliffeqarfinnit pisortanilluunniit ullumikkut aviisi atorlugu, Kujataani saqqummiussaqarnissamik pisariaqartitsisoqanngitsoq paasinarsisimavoq.

Atuaruk: Sulisitsisut aviisit piujunnaarnissaat ernummatigaat

Atuaruk: Tusagassiorfeeraq 300.000-nik tapiiffigineqarpoq