Kalaallit Nunaat akiuussutissanik 13.000-inik piumavoq

Avannaani Tunumilu najugaqartut inersimasut 18-ileereersimasut tamaasa akiuussutissamik piaarnerpaamik neqeroorfigineqarnissaannut Kalaallit Nunaat suliniuteqarusuppoq. Piffissami matumanerpiaq sumiiffinni taakkunani suli akiuussutissalersuisoqarsimanngilaq.

Ilulissat qaangerlugit avannamut aamma Tunumi inoqarfiit tamarmik akiuussutissalersorneqarnissaannut naammattunik akiuussutissanik nassiusseqqusillutik oqartussat Danmarkimut piumasaqarput.

- Tunumi Avannaanilu 18-ileereersimasut tamaasa akiuussutissamik kapinissaannik neqeroorfigisinnaassagutsigit, neqeroorfigisagullu tamarmik akuersissappata, taava akiuussutissanik kapisinerit 13.000-it pisariaqartippagut, nunatta nakorsaanera Henrik L. Hansen oqaluttuarpoq.

Illoqarfinni anginerni akiuussutissamik kapuinerit Danmarkimiit akiuussutissanik tikittoornerit aallaavigalugit ingerlanneqarput. Akiuussutissalersuinerilli kinguaattuulaarsinnaasut ilimagineqarpoq, Danmarkip pissarsiniarnera aamma kinguaattoorfiummat.

Danmarkip akiuussutissamik kapuinerani sapaatit akunnerit sisamanik kinguaattoortoqartussanngornera Kalaallit Nunaannut qanoq sunniuteqassanersoq suli nalunarallarpoq.

Moderna atorneqassaaq

Tunumi Avannaanilu akiuussutissalersuinermut atugassamik Modernameersumik Kalaallit Nunaat piumasaqarsimavoq. Akiuussutissaq Modernameersoq passukkuminarneruvoq angallakkuminarnerullunilu.

Henrik L. Hansen oqaluttuarpoq Avannaani, tassa Uummannami, Upernavimmi aamma Qaanaami nunaqarfinnilu, kiisalu Tunumi Tasiilami aamma Ittoqqortoormiinilu nunaqarfinnilu innuttaasut akiuussutissalersorneqarnissaat pilersaarutaasoq.

- Akiuussutissamik neqeroorfigineqarnermut akuersisimasut tamarmik tikinnermi siullermi kapineqassapput. Sumiiffiit tikikkuminaatsuunerat pissutigalugu arlaleriarluta tikissagutsigu piffissartorfigingaatsiarneqartussaammat sulisunillu atuiffiungaatsiartussaammat ataatsikkut kapuinissaq ingerlanneqassaaq, nunatta nakorsaanera nassuiaavoq.

Namminersorlutik Oqartussat illersornissaqarfimmut oqaloqateqarpoq sulisut akiuussutissallu assartorneqarnissaannut tunngatillugu.

Nakorsaaneq nassuiaavoq Danmarkimut piumasaqarsimanermut tunngatillugu Kalaallit Nunaat "piffissami qaninnerusumik akissutisissasoq".

- Pilersaarutip piviusunngornissaanut inissitassat arlaqarput. Iluarseriarpatali akiuussutissalersuinissaq aprilimi pissasoq naatsorsuutigisinnaavara, oqarpoq.