assammik arsarneq
Kalaallit Nunaat 36 - 24-mik Mexicomut ajugaavoq
Kalaallit Nunaat Amerikap nunavittaani Argentinami Buenos Airesimi pissartanngorniunnermi aappassaanik unammigami ajugaaqqippoq
Kalaallit Nunaata Mexico najummilluarpaa. Ukiut marluk matuma siorna Uruguayimi Amerikap nunavittaani Kalaallit Nunaat aamma ajugaavoq. Nunarput taamani 33-24-imik ajugaavoq.
Nunarput unammineq tamaat siuaqqasoq
Kalaallit Nunaat aallartilluarpoq, minutsit arlaqanngitsut kingorna 3-1-mik siuaqqavoq, muminnermilu 18-12-mik siuaqqalluni. Unamminerup immikkoortuata aappaani siuaqqaneq annertusineqarpoq, 26-18, 30-20 kiisalu unammineq naammassimmat 36-24.
Nunanut allanut unammisartunut sungiusaasup, unamminerup siulia Canadamoorneq assigalugu arsartut nukittunertaat piffissap ilaani sipaarsinnaasimavai. Niels Mølleri tusagassiuutinut nalunaarummi allappoq:
- Unamminerit marluk siulliit iluatsitsiffiusumik naammassivagut. Silatusaartumik unammivugut, tamannalu pitsaasuujuaannarpoq. Chilemut unamminissatsinnut maanna qilaanaalereerpugut, taanna gruppimi ajugaasuni marlunni inissinnissamut pingaaruteqarpoq, taakku semifinalinut annguttussaammata.
Atuaruk: Kalaallit Nunaat siullermeerluni unamminermini ajugaavoq
Kalaallit målertut
- Minik Dahl Høegh 8
- Aqqalu Ingemann 7
- Karl Frederik Frederiksen 5
- Miki Duko Sørensen 4
- Muusaarannuaq O. Søholm 3
- Nuka Heilmann 2
- Lars Ole Lyberth 2
- Inuujuk O. Søholm 1
- Lars Møller 1
- Miki Heilmann 1
- Milan Olsen 1
- Akutaaneq Kreutzmann 1
Kalaallit Nunaata puljerisaani sapaatiummat marloriarluni unammisoqarpoq.
- Canada – Argentina 13-37
- Guatemala – Chile 11-41
Chile maanna unammineqassaaq
Ataasinngornermi Chilemugt unamminermi Kalaallit Nunaata unamminernut siullernut Canadamut Mexicomillu allaanerujussuarmik naatsorsuutigisaqassapput.
Chile nukittuunik unammisartoqarluni sassarpoq, taakku Amerikap nunavittaani pissartanngorniunnerni pingasuni kingullerni bronzennattuupput, nunarsuarmilu pissartanngorniunnernut taamatut peqataanikuullutik.
Chilep ukiorpassuarni siulersortigisimasaa Marco Oneto peqataassanngilaq. Tamannalu unamminermut malunnaataasinnaavoq, tassami Chilep unamminerani titarnerup killingani taanna pingaaruteqartarmat.
Atuaruk: Angutit nunanut allanut unammisartut Argentinaliartussat toqqarneqartut