Aalisarneq
Kalaallit Nunaat 2016-imi Savalimmiut eqqaanni kulmulinik ammassassuarnillu aalisarsinnaavoq
Kalaallit Nunaat Savalimmiut eqqaanni ammassassuarnik saarulliusaanillu kulmulinik aalisarnissaminut periarfissarissaarnerulissaaq. Tamanna erserpoq Kalaallit Nunaata Savalimmiullu aalisarnermut isumaqatigiissutaanni. Isumaqatigiissut malillugu nunat taakkua marluk qaninnerusumik suleqatigiinnialerput
Tallimanngormat decembarip 4-aanni Savalimmitu Kalaallillu Nunaat 2016-imut aalisarnermut isumaqatigiissut atsiorpaat, taannalu malillugu Kalaallit Nunaat 2016-imi Savalimmiut eqqaanni 2500 tonsinik ammassassuarniarsinnaavoq. 2015-imut sanilliullugu 400 tonsinik amerlanerusunik.
Savalimmiut imartaani kulmulinik saarullinnattassat 8000 tonsiupput.
Tamatuma saniatigut NEAFC-p Savalimmiut imartaani pisassiissutaanik Kalaallit Nunaat aalisarsinnaavoq.
Pisassat amerlineqarput
Akerlianik Savalimmiut 2016-imi Kalaallit Nunaata imartaani aalisakkanik immap natermiunik pisassai amerlineqarput. Saarullittassat 470 tonsiniit 825 tonsinut amerlineqarput. Tamatuma saniatigut Savalimmiut najorpilinnik brosminik 475 tonsinik pisassinneqarpoq, isumaqatigiissullu malillugu aamma misilereaalluni saattuanik 500 tonsinik aalisarsinnaalluni.
– Isumaqatigiissutikkut anguniarsimavarput nunat allat imartaanni aalisakkanik natermiunik pisassat amerlisinneqarnissaat, ilaatigut Savalimmiuni aalisakkat natermiut tatineqarnerat pakkersimaarniarlugu. Isumaqatigiissut nutaaq pilersaarummut ilaavoq. Tamakkiisumik isigalugu Kalaallit Nunaannik siammasissumik suleqateqarnitta saniatigut, isumaqatigiissutikkut Kalaallit Nunaannik suleqateqarnerput pitsaanerulersinneqarpoq, Savalimmiuni aalisarnermut ministeri Høgni Hoydal oqarpoq.
Namminersortumik NEAFC-mi ilaasortanngorusupput
Savalimmiut Kalaallillu Nunaata NEAFC-mi ilaasortaaneq suleqatigiissutigaat, nunalli isumaqatigiissutigaat ullumikkutut Danmarki aqqutigalugu ilaasortaajunnaarlutik, namminersortumik ilaasortanngornissartik sulissutiginiarlugu.
Sermitsiaq.AG-p apriilip 12-anni allaaseraa naalagaaffeqatigiinni siuttut 2015-imi ataatsimiinnerannut atatillugu savalimmiuni naalakkersuisut siulittaasuata kissaatigissamaara, Savalimmiut Kalaallillu Nunaata imarmiunik piniartartut kattuffissuini namminersortumik ilaasortaalernissaat. Tamanna pinngisaannarpoq, ataatsimiinnissaq taamaatiinnarneqarmat qinersisartunut qinersineq pissutigalugu.
Savalimmiut Kalaallillu Nunaat aalisarnikkut assigiinngitsunik soqutigisaqarput, atlantikulli kangimut avannaanni aalisarnermut kommissionimi NEAFC-mi Danmarki, Kalaallit Nunaat Savalimmiullu sinnerlugit, arlaleriarluni taaseqataasarsimanngilaq.
Tamanna ilaatigut takuneqarpoq Savalimmiut, Kalaallit Nunaata Norgellu avaleraasartuunik isumaqatigiissuteqarnissaat NEAFC-p akueriumanngimmagu.
Kalaallit Nunaat imminut avaleraasartoortassippoq nunatullu sinerialittut isigineqarumalluni, Savalimmiullu EU-mik Norgemillu ukiunut tallimanut isumaqatigiissuteqarluni.