Kalaallit Nunaannut tunngatillugu oqaaseqartartoq Pituffimmi kiffartuussinissamik isumaqatigiissummut nutaamut isumalluartoq
Karsten Hønge (SF) isumaqarpoq, Pituffimmi kiffartuussinissamik Amerikamiut piginneqatigiiffiannut isumaqatigiissuteqarsimaneq silatusaarnerunngitsoq USA-mit paasineqalersimasoq
Pituffimmi kiffartuussinissamut tunngatillugu tullianik isumaqatiginninniartoqalerpat, neriuutigineqarpoq kalaallit/danskit ingerlatseqatigiiffiutaannut isumaqatigiissuteqartoqassasoq. Taamatut naliliivoq SF-ip Kalaallit Nunaannut tunngatillugu oqaaseqartartua Karsten Hønge.
Taassuma Nunanut allanut tunngasutigut Ataatsimiititaliaq angalaqatigeqqammerpaa, tassani ilaatigut Amerikami illersornissamut ministeeriaqarfik, Pentagon, pulaarneqarsimavoq. Pulaarnermi pisunilu allani kiffartuussinissamik isumaqatigiissut pillugu ajornartorsiut apeqqutigineqartarsimavoq.
- Neriorsuisoqanngilaq, malunnarporli kingullermik isumaqatiginninniartoqarmat iliuuserisimasat pitsaavallaanngitsut pillugit eqqarsaasersortoqartarsimasoq, aamma tullissaanik isumaqatiginninniartoqalerpat allatut ingerlatsisoqarnissaanik pisariaqartitsisoqartoq, Karsten Hønge (SF) Sermitsiaq.AG-mut oqarpoq.
Taanna isumaqarpoq, malittarisassaliortoqassasoq, kingullermisut – Amerikamiut piginneqatigiiffiannut isumaqatigiissuteqarnissamik - pinngitsuuisitsisussamik.
- Isumaqarpunga, Amerikamiut tullissaanik allatorluinnaq aaqqiissuteqarnissaaq qilanaarisinnaagipput.
Aaja pakatsisimasoq
Aaja Chemnitz Larsen (IA) aamma angalaqataasimavoq, ilaatigullu kiffartuussinissamik isumaqatigiissummut tunngatillugu apeqquteqarsimalluni. Karsten Høngeli isumalluaqatiginngilaa.
- Akissutisiamma tamarmik oqariartuutigaat, neqeroortitsinermi malittarisassat malillugit iliuuseqartoqarsimasoq aamma kukkusoqarsimanngitsoq. Taamaammat uanga isumaqarpunga, neriuutigisanniit aaqqiissutissarsinissaq ungasinnerusoq, taanna Sermitsiaq.AG-mut oqarpoq.
- Sianilluanngitsuliornerussaaq
Maanna isumaqatigiissutasup allanngortinneqarsinnaanera ajornarpasikkaluartoq, USA kingullermisut iliuuseqarniaruni, maanna politikkerisaannut naapertuunnavianngilaq, Karsten Hønge taamatut isumaqarpoq. USA ukiuni kingullerni Kalaallit Nunaanni nuannarineqalerusuttutut iliuuseqartarsimavoq, ilaasortallu angalanerminni uppernarsivaat, USA suliniutiminik annertusaanissamut pilersaaruteqartoq.
- Sianilluanngitsuliornerussaaq Amerikamiut kingullermisut suliamik ingerlatsissappata, taamaaliorunimmi Kalaallit Nunaanni innuttaasunit akerlerineqartussaapput, Karsten Hønge oqarpoq.
- Amerikamiut kingullermik Kalaallit Nunaannik uukapaatitsipput, Nunattalu Karsianit 200 millioner koruuninik pissarsillutik, taamaalioqqissagunik Nuummi piorsarsimassutsikkut paarlaaqatigiinnissaq tuluttullu ilinniartitsinissaq iluaqutaanavianngillat.