Kalaallit Nunaannit imeq: Imivik avammut nioqquteqarnissamut akuersissummik tunineqarpoq
Imermik ingerlatseqatigiiffiit sisamat imermik nunatsinneersumik avammut nioqquteqarnermik ingerlataqalereersimapput imaluunniit ingerlataqartussanngorlutik. Koldco Paamiuni imermik annertuumik akikitsumik tunisassiornissamik suli siunnerfeqarpoq, Inland Icelu imermik puiaasaniittumik neriniartarfinnut akimasunut tunisassiornermik ingerlataqarluni.
Greenland Water Bank Svend Hardenbergimit aamma Jørgen Wæver Johansenimit siuttuuffi gineqartoq kiisami avammut nioqquteqarnissamut akuersissummik tunineqarpoq, taamaalillunilu tunisassiaat Imivik Qeqertarsuarmi Uunartuarsuup Puilasuaneersoq nunap killeqarfiata avataanut nioqqutigineqarsinnaanngussalluni.
Aviisi Sermitsiaq taama allappoq.
– Avammut nioqquteqarnissamut akuersissut kiisami pissarsiaraarput. Kisianni atuutilinnginnerani tungitsinnit naalakkersuisumillu atsiorneqalaaqqaassalluni. Taamaattumik siornatigut attaveqarfigisimasagut imermik tunisassiatsinnik pisinissamut soqutiginnittut tamaasa attaveqarfigalugit aallartissaagut suli soqutiginninnersut paasiniarlugu. Taamaattumimk aallartinneq »nillertoq« pineqarpoq, kisianni kiisami ajornarunnaarnera nuannaarutigaarput. Tassami imermik avammut nioqquteqarnissamut akuersissummik siornatigut arlalippassuariarluta qinnuteqartarsimavugut, Svend Hardenberg Sermitsiamut oqarpoq.
Inuussutissarsiutinik ingerlatseqatigiit taakkua marluk imermik Uunartuarsuup Puilasuaneersumik avammut nioqquteqarnermik siullermeerlutik aallartitsiniarnerannit ukiut pingasut qaangiutereersimalerput. Periarfissarli tamanna Schweizimiut ingerlatseqatigiiffiata Greenland Spring Waterip imermik puilasumeersumik avammut nioqquteqarnissamut kisermaassisussaatitaaneranit akornuserneqarsimavoq, naak Namminersorlutik Oqartussanut isumaqatigiissummi piumasaqaatinik naammassinnissimanngikkaluartut. Taamaattumik Imivik Puilasumit ukiuni kingullerni pingasuni nunap killeqarfiata iluaniinnaq nioqqutigineqarsimavoq.
Imeq puiaasamiittoq nuimasunut tuniniarneqartoq
Ingerlatseqatigiiffik alla imermik nunatsinneersumik nunanik allanik tiguaaniarluni aamma ingerlaleruttorpoq. Inland Ice, Inuussutissarsiornermut Naalakkersuisoqarfiup Kinami novembarimi 2018-imi nittarsaassineranut peqataasoq, ingerlalluarnerulersimavoq akuersissutaateqarfimminillu Kangilinnguit eqqaanniittumit imermik 1,2 milliuunit liiterimik suli allamik ukioq manna aallarnissaminik naatsorsuutiginnilluni.
Erngup nunanut allanut nioqqutigineqarnera pillugu aviisimi Sermitsiami atuarnerusinnaavutit. Aviisi uani ataani pissarsiarisinnaavat: