Kalaallit Nunaannit imeq sermerlu tuniniarneqartut

Inuussutissarsiornermut Nukissiornermullu Naalakkersuisoqarfiup imeqarfinnik neqeroortitsinissamik suliaqaqqammersup Kinamiut, noorliit qallunaallu ingerlatseqatigiiffii Kalaallit Nunaanniit imermik sermimillu tuniniaatikkusuppai.

Inland Icemi pisortaq Thomas Vildersbøll Ivittuut avannaani imeqarfimmit imermik 246.500 literimik aallerpoq. Maanna puiaasanut maqineqarpoq tuniniarneqaleruttorlunilu.

Kalaallit Nunaannit imeq sermerlu nunarsuup sinneranut tunineqarsinnaasariaqarpoq. Naalakkersuisut taamak isumaqarput, ukiullu aallartinnerani ingerlatseqatigiiffinnik Kalaallit Nunaata kitaani sumiiffinnit tallimanit imermik sermimillu niuernikkut atuinissamik neqeroortitsillutik.

Aviisi Sermitsiaq taama allaaserisaqarpoq.

- Neqeroortitsinermi siunertaavoq nunarsuup affaani avannarlermi imeqarfiit annersaannik atuisinnaanissaaq minnerunngitsumik imermik immikkut ittumik mamartumik minguitsumillu. Sumiiffik ataaseq Paamiut eqqaaniippoq, marluk Nuup eqqaaniittut marlullu Maniitsup eqqaani. Sumiiffiit toqqarneqarput taakkunani imeq minguitsoq annertooq kuummat sumiiffiillu tikikkuminartuullutik. Nutaarluinnartut sumiiffiit neqeroortitsinermi neqeroorfigineqarsinnaassapput, Naalakkersuisoqarfik allappoq, GEUS-ilu teknikkikkut nalunaarusiortissimallugu sumiiffinni misissuinerit allaaserineqarlutik, imeqassutsimullu pitsaassutsinut allanullu atatillugu misissuinerit inernerinik imaqarluni.

Inuussutissarsiornermut Nukissiornermullu Naalakkersuisoq Aqqalu Jerimiassen siorna oktobarimi Kinami ussassaariartorpoq tassani imermut sermimullu akuersissutit tuniniarneqarlutik, ukiorlu manna januaarimi Tysklandimiilluni periarfissat suliffissuarnut nittarsaanniarlugit.

Ivittuut eqqaani imermik aallertoq

Ingerlatseqatigiiffiit marsimi 2018-imi misissuinissaminnik – killilimmillu tuniniaanissaminnik - akuerineqartut ilaat tassaavoq Danmarkimi ingerlatseqatigiiffik Inland Ice. Neqeroortitsisoqarmat neqerooruteqarput Ivittuullu avannaani imermik aallarfiusinnaasumut akuerineqarlutik, taannalu GEUS-ip sumiffiit maannakkut suliffissuarnut neqeroorfigineqarsinnaasut assigalugit misissorsimavaa.

Allaaserisaq tamaat Sermitsiami atuaruk – uani ataani linki aqqutigalugu aviisimut isissutissarsigit:

Powered by Labrador CMS