Kalaallit Nunaannit aqerluusassaq grafit nunarsuarmi biilini sarfatortuni
Nanortallip eqqaani aqerluusassamik grafitimik piiaaffik Kujataamiunut suliffissaqartitsissaaq. Piiaaffik ukiut 100-t matuma siornatigut ingerlanneqartoq ukiut sisamat qaangiuppata ammaqqissasoq naatsorsuutigineqarpoq. Grafit biilit innaallagiatortut batteriivini pingaaruteqarpoq. Kalaallit Nunaat nunarsuarmi minguinnerpaamik grafiteqarpoq, piumaneqalipiloorsimavorlu.
Biilinik innaallagiatortunik niuerfik annertuunik isumalluutigineqarpoq. Kalaallit Nunaalltu aamma taakkununnga ilanngussinnaavoq Nanortallip eqqaani aatsitassarsiorfissamit biilinut innaallagiatortunut tunisassiassanut atortussamik pingaarutilimmik pilersuinermi. Biilimmi innaallagiatortut batteriivini grafit kiilorpassuit atorneqartarpoq. Kalaallit Nunaallu grafitimik minguinnerpaamik pitsaanerpaamillu pilersuisinnaavoq.
Aviisi AG taama allappoq.
Nunarsuarmi batteriinik tunisassiorfiit annertuupilussuarmik grafitimik atorfissaqartitsipput. Naatsorsuutigineqarpoq 2030 tungaanut batteriinut lithiuminut grafitimik pisariaqartitsineq 2020-mi atuinermut sanilliullugu 20-riaammik annertusisimassasoq.
Ingerlatseqatigiiffik GreenRoc Europami Amerikallu avannaani niuerfimmut grafitimik pilersuinissaminut piareersimavoq, maanna biilinik tunisassiortut annertuumik tunisassiatik biilinut innaallagiatortunut nikisikkiartuaarneranni.
Ingerlatseqatigiiffiup Londonimit aallaaveqartup pilersaarutigaa ukiut sisamat qaangiuppata Nanortalimmiit 20 kilometerinik ungasitsigisumi qeqertami Amitsumi grafitimik piiaavimmik ammaanissaq. Aatsitassarsiorfiliornissamik suliniut ukiut marluk qaangiuppata aallartissasoq naatsorsuutigineqarpoq, ingerlatseqatigiiffimmi pisortaaneq Stefan Bernstein ilisimatitsivoq.
Naak ullumikkut Kina grafitimik kisermaassipajaaraluartoq ingammillu grafitip ilaatigut biilinut innaallagiatortunut angerlarsimaffimmilu atortorissaarutikujunnut piareersarnerannut atorneqartartumik, Bernstein isumaqarpoq niuerfimmi aamma Kalaallit Nunaanni aatsitassarsiorfimmut inissaqartoq.
Kujataamiut sulisoriniarai
Nunarsuarmi pissutsinut naleqqiullugu aatsitassarsiorfik annertunngilaq. Grafitilli pitsaanerujussuatigut soqutiginarluni.
- Amitsoq annertuumik aatsitassarsiornermi suliniutaanngilaq. Ukiumut aatsitassaq 400.000 tonsi piiarniarlugu pilersaarutigaarput. Angissutsimigut Maarmorilimmi piiaavimmut assersuunneqarsinnaavoq, tassani ukiumut saffiugassaq 500.000 tons piiaarneqartarsimalluni.
Aviisimi AG-mi atuarnerusinnaavutit. Aviisi uani pissarsiariuk:
