Kalaallit Nunaanniit nutserarneq
Kalaallit Nunaanniit Danmarkimut nuunnissaminnik aalajangertartut suna maanna pissutigisarpaat? Tamanna paasisariaqarparput, Inuit Ataqatigiinniit Folketingimutilaasortaq oqarpoq. Taanna misissuinissamut aningaasaleeqqusivoq.
Qallunaat 2023-mut aningaasanut inatsisissaata Folketingimi ataatsimiittarfimmi oqallisigineqarnerani Inuit Ataqatigiinniit Folketingimi ilaasortaq Aaja Chemnitz kalaallit Danmarkimiittut pillugit misissuinermik nutaamik pisariaqartitsisoqartoq oqarpoq.
Misissuineq kingulleq 2015-imeersuuvoq taamani kalaallit Danmarkimi najugallit 14.000-it missaanniikkallarmata. Kisitsit maanna 20.000-ingajaavoq kalaallillu taama amerlatigisut sooq Danmarkimut nuuttarnerarinut pissutaat assigiinngillat.
Tamakkuali misissorneqartariaqartut Aaja Chemnitz isumaqarpoq.
Aviisi Sermitsiaq taama allappoq.
– Naalagaaffimmi nuttarsinnaanermut kiffaanngissuseqarpugut, kisianni kalaallit isiginnittariaasianiit Kalaallit Nunaanni atorfissaqartinneqartorpassuit Danmarkimut nuuttarput. Inuit suliffeqartut, aanaakkut ernuttatik qimallugit nuuttartut ilinniartullu angerlaqqittanngitsut, Aaja Chemnitz oqarpoq nangillunilu:
- Kalaalerpassuit nammineq qitornaalluunniit innarluuteqartut ukiut tamaasa nuuttartut amerlapput, Kalaallit Nunaanni ikiorneqartutut misiginnginnamik. IA-miit pingaarnersiorusupparput misissuinissamut aningaasaliisoqarnissaa, kalaalerpassuit sooq nuuttarnerat qulaajarneqassalluni politikkikkullu allanngortinnissaanut iliuuseqarfigineqarsinnaanersoq paasiniarneqassalluni.
Allaaserisaq tamaat Sermitsiami sapaatip-akunnerani saqqummersumi atuaruk, uani: