Kalaallit Nunaanni sakkutuunngorniarsinnaanermut misilitsigit
Anguti arnallu inuusuttut Kalaallit Nunaanni illoqarfinni sisamani sakkutuunngorniarsinnaanermut maanna misilitsissinnaanngorput.
Illersornissaqarfik Kalaallit Nunaanni illoqarfinnut sisamanut tikissaaq, angutit arnallu Danmarkimi sakkutuunngorniarnissamut soqutiginnittut misilitsikkiartorlugit.
Illersornissamut Ministeeriaqarfimmi Sulisunut Aqutsisoqarfik tusagassiorfinnut nalunaarummini taamatut allappoq.
Illersornissaqarfik illoqarfinni ukunaniissaaq:
Aasiaat 24.-25. oktober
Sisimiut 27.-28. oktober
Nuuk 1.-2. november
Qaqortoq 6. november
- Illersornissamut ministeritut akisussaaffigivara qulakkiissallugu, Illersornissaqarfiup Kalaallit Nunaanni Kalaallillu Nunaata eqqaani siunissami unammilligassaajumaartunut pitsaanerpaanik atortoqartinneqarnissaa. Kalaallit Nunaanni misilitsittarnerit illoqarfinni sisamani pisartussanngorlugit ukioq manna annertusivavut, tamannalualloriarneruvoq pingaarutilik. Taamaammat kalaallit inuusuttut sakkutuunngorniarnissamut Kalaallit Nunaanni ukiaq manna misilitsinnissamik eqqarsaateqartut tamaasa imatut oqarfigerusuppakka: Pisariaqarteqaatsigit. Illersornissaqarfiup Kalaallit Nunaanniinera aamma Naalagaaffiup tamarmiusup isumannaatsuuneranik isumaginninnissaq pillugit siunissami suleqatigiinnissamut pingaaruteqarpusi, illersornissamut ministeri Trine Bramsen tusagassiorfinnut nalunaaruteqarnermini taamatut oqarpoq.
Ullormi takkuffimmi isumaqatigiissusiortoqartassasoq
Arnat angutillu 18-inik ukioqalereersimasut isumaqatigiissuteqaqqaaratik takkussinnaapput, eqqarsartaatsimikkullu misilitsillutik, nakorsamit misissorneqarlutik ilitsersorneqarlutillu, taakku tamarmik nalunaaquttap akunnerata aappaa avillugu sivisussuseqassapput.
- Kalaallit Nunaanni najugaqaraanni sakkutuunngorusullunilu, taava Kalaallit Nunaanni illoqarfinnut sisamaniilerutta sakkutuunngorniarluni militsinnissaq ajornannginneralaanngussaaq. Tassani sakkutuunngortoqarsinnaanersoq imaluunniit sakkutuunngornissamut killilimmik piginnaasaqartoqarnersoq paasineqassaaq. Sakkutuunngorniarsinnaaneq ajornanngippat Danmarkimi sakkutuunngorniarluni ilinniarnissamut ingerlaannaq isumaqatigiissusiortoqassaaq, Kaptajn Dennis Rasmussen, Kalaallit Nunaanni misilitsinnissamut akisussaasuusoq ilisimatitsivoq.
Illersornissaqarfik Kalaallit Nunaanni illoqarfimmi ataatsimi sakkutunngorniarnissamut misilitsitsiartorluni siorna siullermeerluni nunatsinniippoq.
Kingullermik inuit 22-t Sakkutuuni, Sakkutuuni imarsiortuni Upalungaarsimasunilu sakkutuunngorniarlutik isumaqatigiissummik atsiorput, Illersornissaqarfimmillu neriuutigineqarpoq ukioq manna soqutiginnittut amerlanerussasut.